მმართველი გუნდის წევრის, ზვიად კვაჭანტირაძის განცხადებით, არის მცდელობა, „რუსთავი 2“-ის თემით მანიპულირება ესკალაციის მიზნით მოხდეს. მისი თქმით, ხელისუფლების მხრიდან „რუსთავი 2“-ის მაუწყებლობის შეწყვეტა არ იგეგმება.
როგორც დეპუტატმა განაცხადა, მთავარია, რომ მაუწყებლობის შეწყვეტა არხის დღევანდელმა ხელმძღვანელობამ მოვლენების შემდეგი ესკალაციისა და პროვოცირების მიზნით, თავად არ გადაწყვიტოს.
კვაჭანტირაძის შეფასებით, არაერთხელ დადასტურდა, რომ „რუსთავი 2“-ის ხელმძღვანელობა პოლიტიზირებულია და ისინი არც მალავავენ იმას, რომ არიან ერთი პოლიტიკური ძალის რუპორები და მხარდამჭერები, რის გამოც ისინი განცხადებებს კონკრეტული პოლიტიკური ძალის ინტერესებით აკეთებენ.
„ნიკა გვარამიას განცხადებისთვის არ მისმენია, მაგრამ რაც გადმოცემით ვიცი, შანტაჟის ტონი მისი განცხადებიდან უფრო მოდის, ვიდრე საერთოდ სადმე არის. „რუსთავი 2“-ის საინფორმაციო პოლიტიკის რეპუტაციიდან გამომდინარე, პირადად ჩემთვის არანაირი საფუძველი არ მაქვს, რომ ნიკა გვარამიას დავუჯერო. აღნიშნულ თემასთან დაკავშირებით, კომენტარის გაკეთება არ მინდა, სანამ სასამართლო მუშაობს და სანამ სასამართლო საკუთარ ვერდიქტს არ გამოიტანს. იმისგან შორს ვარ, რომ ჭიქაში ქარიშხალის ატეხვის მცდელობას მხარი უნდა ავუბათ. არის მცდელობა, რომ „რუსთავი 2“-ის თემით მანიპულირება ესკალაციის მიზნით მოხდეს. ეს აშკარად სახეზეა, მაგრამ არცერთ შემთხვევაში, „რუსთავი 2“-ის დღევანდელი ხელმძღვანელობის მხარდასაჭერად გამართულ აქციებს არ ვგულისხმობ. ამის უფლება ნებისმიერ მოქალაქეს აქვს, მაგრამ როდესაც საუბარია იმის თაობაზე, რომ თითქოს, მზად არიან რაღაც დაგეგმილ ძალადობას ძალადობით უპასუხონ, მაგრამ ხელისუფლების მხრიდან არნაირი ძალადობა არ იგეგმება. არც ისეთი ქმედება არ იგეგმება, რომელიც შეიძლება სამართლებრივ სივრცეს გასცდეს“, - დასძინა კვაჭანტირაძემ.
