,,საქართველოს ევროპელი დემოკრატების” ლიდერი პაატა დავითაი აცხადებს, რომ ტელეკომპანიის ხელში ჩაგდება ძალადობრივი გზით ხდება,
რუსთავი 2-ის გენერალური დირექტორის ნიკა გვარამიას საგანგებო განცხადებასთან დაკავშირებით, დავითაია ამბობს, რომ ფარული და უკანონოდ გადაღებული კადრებით შანტაჟი, რაც ოჯახის ფაქტორს ეხება დაუშვებელია.
,,ეს არის ზღვარი, რომელიც პოლიტიკოსებმა არ უნდა გადალახონ. ასეთი შანტაჟის პირობებში კი სასამართლოს დამოუკიდებლობაზე საუბარი არასერიოზულია. თუ ეს ზღვარი გადალახული იქნება თქვენს ოჯახებსაც შეეხებიან და პირველ რიგში ეს ავნებს ქართულ სახელმწიფოს და ქართული სახელწმიფო კითხვის ნიშნის ქვეშ დადგება, მას პასუხს აგებინებს საზოგადოება. ეს არის ყოვლად მიუღებელი,“ - აცხადებს პაატა დავითაია.
რუსთავი 2 -ის გენერალური დირექტორი მის მიმართ განხორციელებულ მუქარაზე საუბრობს და აცხადებს, რომ მას არხიდან წასვლა ურჩიეს. როგორც მან კურიერის სპეციალურ გამოშვებაში განაცხადა, არც ერთი შანტაჟის სანაცვლოდ არ დატოვებს არხს.
,,მე მგონია, რომ შანტაჟის ყველაზე სწორი გზა არის საუბარი ამაზე. გაცილებით უფრო მნიშვნელოვანი სიკეთე დევს სასწორზე, ვიდრე ჩემი პირადი კეთილდღეობა ან ა.შ. დღეს სასწორზე რუსთავი2-ის მაუწყებლობაზე მნიშვნელოვანი რამეც დევს. დღეს სასწორზე დევს ქვეყნის მომავალი, ქვეყნის დემოკრატიის მომავალი. პირდაპირ მივმართავ ხელისუფლებას- ატვირთეთ რაც გნებავთ, თავიც ჩემია ფეხიც და ყველა დეტალიც. ჩემთვის არის ღრმად სულ ერთი ჩემი პირადი ცხოვრება არის ჩემი პირადი ცხოვრება და არ ეხება სხვას. თუ მე ვარ უკანონო მიყურადებისა და თვალთვალის მსხვერპლი ამისთვის აუცილებლად გაგებინებთ პასუხს, არა ურთმელიძის არამედ დამოუკიდებელი სასამართლოს წინაშე. არაფერი ცხოვრებაში არ ჩამიდენია ისეთი, რომლის გამოქვეყნებაც იქნებოდა იმაზე უარესი, ვიდრე ჩემი დღეს რუსთავი 2-დან გაქცევა. ჩემი კოლეგების, იმ ადამიანების ღალატი ვის წინაშეც პასუხისმგებლობა ავიღე და გავყვები აუცილებლად ბოლომდე და რაც მთავარია, ჩვენი ტელემაყურებლების ღალატი. ამას მე არ ჩავიდენ არც ერთი შანტაჟის და გადაწყვეტილების სანაცვლოდ. როგორი გადაწყვეტილებაც არ უნდა გამოიტანოს ხვალ მოსამართლემ ხვალინდელი გადაწყვეტილება არის აპრიორი უკანონო. ჩვენ არ ვაპირებთ მის აღსრულებას. ჩვენ ვაპირებთ მაუწყებლობას იმ ფორმატით რაც გვაქვს. იმ ვითარებაში თუ იქნება კომპანიაში ძალისმიერი შემოჭრა ჩვენ დავიცავთ ძალისმიერად თავს. არ ვაპირებთ დავთმოთ ტელეკომპანია ჩვენი სიტყვის თავისუფლება და ქვეყნის დემოკრატიული პერსპექტივა. ყველასთვის გასაგებია რა ხდება ქვეყნაში,"- განაცხადა ნიკა გვარამიამ.
