კვერცხის სროლა დემოკრატიის ნაწილია, მოგწონთ ეს თუ არა, - ამის შესახებ თავდაცვის მინისტრმა თინა ხიდაშელმა საკონსტიტუციო სასამართლოს თავმჯდომარის გიორგი პაპუაშვილის მიერ დღეს გავრცელებულ განცხადებასთან დაკავშირებით განაცხადა.
„ვიდრე წერილს არ წავიკითხავ, არ ვიცი, რა წერია მასში. ასე აბსტრაქტულად რაიმე პასუხის გაცემა გამიჭირდება. ნამდვილად ყოველდღიურ რეჟიმში მოსამართლეების სახლების წინ არ ვდგავარ, რომ ვიცოდე ვინ ვის რას ეუბნება და რა ხდება. კვერცხის სროლა დემოკრატიის ნაწილია, მოგწონთ ეს თუ არა“, - განაცხადა თინა ხიდაშელმა და დასძინა, რომ პაპუაშვილის განცხადებასთან დაკავშირებით დეტალებზე მისი გაცნობის შემდეგ ისაუბრებს.
საკონსტიტუციო სასამართლოს თავმჯდომარემ პრეზიდენტს, პრემიერ-მინისტრს და პარლამენტის თავმჯდომარეს დღეს წერილობით მიმართა და მოუწოდა, კანონის ფარგლებში გამოიყენონ უფლებამოსილება, მიიღონ სათანადო ზომები საკონსტიტუციო სასამართლოსა და ინდივიდუალურად მოსამართლეების მიმართ განხორციელებულ უკანონო ქმედებებზე შესაბამისი სამართლებრივი რეაგირებისა და საკონსტიტუციო სასამართლოს შემდგომი საქმიანობის ხელშემშლელი ფაქტორების დროულად აღსაკვეთად.
