პარლამენტის ადამიანის უფლებათა დაცვის კომიტეტის თავმჯდომარის პირველი მოადგილის, გედევან ფოფხაძის განცხადებით, წამების ამსახველი კადრების გასაჯაროვება არ უნდა მომხდარიყო.
როგორც ჟურნალისტებს ფოფხაძემ განუცხადა, ხელისუფლებას აღნიშნული კადრების გასაჯაროვების საშუალება ადრეც ჰქონდა, მაგრამ შეთანხმება იყო მიღწეული, რომ ეს არ მომხდარიყო.
„შეიძლება, საზოგადოების გარკვეულ ნაწილს იმის ნახვა სურდა, რაც ხდებოდა, მაგრამ არის რაღაც, რითაც საზოგადოების ფსიქიკა უნდა დავინდოთ. ამ კადრებს იმას ვადარებ, რაც გერმანიის კონცლაგერებში ხდებოდა. ფაშისტურ გერმანიაში გაკეთებული ავტოტრასები იმას არ ნიშნავდა, რომ ამის ფასად კონცლაგერები უნდა ყოფილიყო. პოლიტიკური გადაწყვეტილება მივიღეთ, რომ ეს კადრები არ უნდა გასაჯარავებულიყო, რაც მაშინ მორალური გადაწყვეტილება იყო. ერთმანეთის ემოციურ მდგომარეობას უნდა გავუფრთხოლდეთ და საზოგადოება გადაწყვეტილებას ზიზღის მოტივაციით არ უნდა ღებულობდეს. ამ კადრების გასაჯაროვება ჩვენს ინტერესებში არ შედიოდა“, - დასძენს ფოფხაძე.
