პარლამენტის ევროინტეგრაციის კომიტეტის თავმჯდომარის, ლევან ბერძენიშვილის განცხადებით, თუკი ჰააგის სასამართლოს შეუძლია ვინმეს ბრალეულობა დაადგინოს, პირველ რიგში, რუსეთის მაშინდელი პრეზიდენტის, დიმიტრი მედვედევისა და პრემიერის, ვლადიმერ პუტინის ბრალეულობის საკითხი უნდა გამოკვეთოს.
როგორც „ჯი-ეჩ-ენ“-ს ბერძენიშვილმა განუცხადა, მთავარია, ჰააგის სასამართლომ ის დაადასტუროს, რაც ეუთოს დასკვნაში წერია - ქართველების ეთნიკური წმენდა.
„ძალიან სასაცილო იქნება, რომ ჰააგის სასამართლომ ომში დამნაშავის სახით საქართველო, ან სამხრეთ ოსეთი იპოვოს. სანამ სააკაშვილი ხელისუფლებაში იყო, ვიღაცას იმედი ჰქონდა, რომ ჰააგის ტრიბუნალით სააკაშვილს დაამარცხებდნენ, მაგრამ ეს სამართლიანი იმედი არ იყო, რადგან სააკაშვილის დამარცხება საქართველოს დაზიანების გარეშე შეუძლებელი იყო. ამიტომ, ამ ბრიყვულ და არასახელმწიფოებრივ მიდგომას თავი უნდა დავანებოთ“, - განაცხადა ბერძენიშვილმა.
კანონმდებელის თქმით, 2008 წლის აგვისტოს ომი საქართველოს არ დაუწყია და არც არაფერი დაუშავებია.
„საქართველო თავის ტერიტორიაზე წესრიგის დაცვას ცდილობდა. საქართველოს ოკუპირებული ტერიტორიები აქვს. ჰააგის პროკურორებს ბევრი სამუშაო აქვთ და საუბარი იმის თაობაზე, რომ თურმე, რუსების დანაშაული არ იკვეთება, არასერიოზულია. ყველაზე დიდი დამნაშავე ოკუპანტი - რუსეთია“, - დასძენს ბერძენიშვილი.
2008 წლის აგვისტოს ომის მოვლენების გამოძიების მოთხოვნით, ჰააგის სასამართლოს საქართველოს ხელისუფლებამ მიმართა და ჰააგის პროკურორების მიერ მოვლენების გამოძიებაც დაანონსდა.
