„ერთიანი ნაციონალური მოძრაობის“ დეპუტატ ნუგზარ წიკლაურის განცხადებით, პრემიერის, ვიცე-პრემიერისა და ყოფილი პრემიერის განცხადებების მერე, სრულიად უადგილოა „რუსთავი 2“-ის გარშემო მიმდინარე მოვლენებს, ორ სუბიექტს შორის დავა ვუწოდოთ.
„თუ ამ მოვლენებს ორ სუბიექტს შორის დავას ვუწოდებთ, მაშინ რა ვუყოთ ივანიშვილის განცხადებას, რომ ძალიან კარგია „რუსთავი 2“ ის წინააღმდეგ პროცესის დაწყება, ღარიბაშვილის განცხადებებს, ვიცე-პრემიერ კალაძის განცხადებებს, რომ „რუსთავი 2“ თავის მეპატრონეებს დაუბრუნდება. ყველაფერი ცხადია - ესაა პოლიტიკური დავა. ამაყად აცხადებთ, რომ მედიის თავისუფლება შეუზღუდავია,.თუ ასეა, მაშინ რა ვუყოთ ინგა გრიგოლიას, რომელიც გამოაძევეს? რატომ დაიხურა მაესტროს თოქშოუები? რა ვუყოთ იმ ფაქტს, რომ ეკა მიშველაძე თითიდან გამოწოვილი ბრალდებით გაუშვით? წლების განმავლობაში თავს ესხმით ყოველგვარ განსხავვებულ აზრს. ამბობთ სასამართლო შეუზღუდავიაო, გამუდმებით იმეორებთ. თუ ასე, მოსამართლე ურთმელიძე რომ პოლიტიკურ მძევლად გყავთ აყვანილი ამას რა ვუყოთ? ყველაფერი ნათელია, ვერავის ვერ დაარწმუნებთ, რომ სინამდვილეში ამაღლებული ინტერესები გამოძრავებთ და არა მდაბიო სურვილი - არ გაიგონოთ ის, რისი გაგონებაც არ გსურთ”, - მიმართა წიკლაურმა საპარლამენტო უმრავლესობის წევრებს.
