პარლამენტის საფინანსო-საბიუჯეტო კომიტეტის თავმჯდომარის პირველი მოადგილე ნოდარ ებანოიძე იმედოვნებს, რომ ეროვნულ ბანკთან დაკავშირებით, საკონსტიტუციო სასამართლო მოკლე ვადებში იმსჯელებს და შესაბამის გადაწყვეტილებას მიიღებს.
როგორც ჟურნალისტებს საკონსტიტუციო სასამართლოს გადაწყვეტილებასთან დაკავშირებით ებანოიძემ განუცხადა, ფინანსური ზედამხედველობის სამსახურს საკუთარი უფლებამოსილების შესრულება ჯერ არ დაუწყია.
„ჯერჯერობით, ზედამხედველობის უფლებამოსილება კვლავ ეროვნული ბანკის მიერ ხორციელდება და მიმდინარე ეტაპზე, ფინანსური ზედამხდველობის სამსახური საორგანიზაციო საკითხებს წყეტს. შესაბამისად, საკონსტიტუციო სასამართლოს გადაწყვეტილებით არსობრივად არაფერი იცვლება. იმედი მაქვს, რომ ეროვნულ ბანკთან დაკავშირებით საკონსტიტუციო სასამართლო მოკლე ვადებში იმსჯელებს და შესაბამის გადაწყვეტილებას მიიღებს. ეჭვი მეპარება, სერიოზული არგუმენტები არსებობდეს იმასთან დაკავშირებით, რომ პარლამენტის მიერ მიღებული მოდელი კონსტიტუციას ეწინააღმდეგება. რაკი, საკონსტიტუციო სასამართლომ მიიჩნია, რომ საკითხზე უნდა იმსჯელოს, კი ბატონო, იმსჯელოს“, - დასძინა ებანოიძემ.
„ეროვნული ბანკის შესახებ“ კანონში ცვლილებები დეპუტატებმა ნოდარ ებანოიძემ და თამაზ მეჭიაურმა მოამზადეს, რომლის მიხედვითაც, ეროვნული ბანკის დაქვემდებარებიდან ფინანსური ზედამხედველობის სააგენტო გამოვიდა. პარლამენტის მიერ მიღებულ კანონპროექტს პრეზიდენტ გიორგი მარგველაშვილმა ვეტო დაადო, რომელიც უმრავლესობა სექტემბერში დაძლია, უმცირესობამ და „თავისუფალმა დემოკრატებმა“ კი საკონსტიტუციო სასამართლოს მიმართეს.
საკონსტიტუციო სასამართლომ ეროვნული ბანკის შესახებ სარჩელი წარმოებაში მიიღო და საფინანსო ზედამხედველობის სააგენტოს მუშაობა შეაჩერა.
