პოლიტიკურ საკითხებში პრეზიდენტის ახალი მრჩეველის ფიქრია ჩიხრაძის ინფორმაციით. ,,გაზპრომთან" დაკავშირებით, საქართველოს პრეზიდენტის ადმინისტრაციაში ინფორმაციის მოპოვება მიმდინარეობს.
მისი თქმით, გათვალისწინებული უნდა იყოს ის მწარე გამოცდილება, რომელიც არა მარტო საქართველოს, არამედ ევროპელ პარტნიორებსაც აქვთ.
,,"გაზპრომის" გამოყენება ხდებოდა პოლიტიკურ იარაღად. რაც შეეხება პროცესებს, რომელიც ახლა მიმდინარეობს და, რომელიც არ არის მაინცდამაინც გამჭვირვალე საზოგადოებისთვის, პრეზიდენტის ადმინისტრაცია დაკავებულია, რომ აქტიურად მივიღოთ ინფორმაცია, რასთან გვაქვს საქმე. ჩვენთვის, საქართველოსთვის, საქართველოს ხელისუფლებისთვის უმნიშვნელოვანესია ჩვენი სტრატეგიული ურთიერთობები აზერბაიჯანთან, როგორც პოლიტიკური, ასევე ენერგოუზრუნველყოფის თვალსაზრისით", - განაცხადა ფიქრია ჩიხრაძემ.
მისივე თქმით, არანაირი საფრთხე არ იყო, რომ აზერბაიჯანული გაზის ნაკადის შემცირების ან ფასის თვალსაზრისით რამე მოულოდნელი ცვლილება გველოდება.
რაც შეეხება უშიშროების საბჭოს მოწვევის შესახებ იდეას, ფიქრია ჩიხრაძემ აღნიშნა, რომ უშიშროების ეროვნული საბჭო პრეზიდენტის სათათბირო ორგანოა და ახლო ხანებში ამ საკითხზე გადაწყვეტილება იქნება მიღებული.
