ჩვენ რუსეთს ვაბარებთ პოლიტიკურ ბერკეტს ზემოქმედებისთვის, - განაცხადა ”თავისუფალი დემოკრატების” ლიდერმა ირაკლი ალასანიამ. მისი თქმით, ის სიახლე, რაც საზოგადოებამ შეიტყო, რომ ფარული, მალული მოლაპარაკებები მიდიოდა რუსეთის ფედერაციასთან და გაზპრომთან კიდევ ერთხელ მეტყველებს იმაზე, რომ აშკარა კითხვები ჩნდება ქვეყნის უსაფრთხოების, ენერგოუსაფრთხოებისა და ქვეყნის უსაფრთხოების ორიენტაციაზე.
”არ ვარ წინააღმდეგი არსებობდეს მოლაპარაკებები ნებისმიერ კომერციულ საკითხზე სხვადასხვა ქვეყნის წარმომადგენლებთან და მათ შორის საქართველოს ინტერესების გათვალისწინებით არ უნდა იყოს შეზღუდვები თუ როგორ უზრუნველყვოფთ ჩვენი ქვეყნის ინტერესების განხორციელებას. მაგრამ, როცა საქმე გვაქვს რუსეთთან, რომელსაც აქვს ჩვენი ტერიტორიის 20% ოკუპირებული და როცა რუსეთმა უახლოეს წარსულში სწორედ ენერგომატარებლების გადაკეტვით პოლიტიკური ზეწოლის არაერთი მცდელობა განახორციელა საქართველოსთან მიმართებაში და მეორე მხარეს, როდესაც გვყავს ისეთი სტრატეგიული პარტნიორები როგორიც არის თურქეთი, აზერბაიჯანი და გახსოვთ თქვენ, აზერბაიჯანმა რუსეთ-საქართველოს ომის დროს მიუხედავად დიდი ზეწოლისა პირდაპირ რუსეთის პრეზიდენტის მხრიდან ნამდვილი, ჭეშმარიტი მეგობრობა გაგვიწია. ამ პირობებში აბსოლუტურად გაუგებარია რატომ არის გადატანილი აქცენტი გაზპრომზე... ფარული მოლაპარაკებები ისეთ საკითხებზე, როგორიც არის ჩვენი ქვეყნის უსაფრთხოება, რომელიც არის ჩვენი ქვეყნის უსაფრთხოების საფუძველი, დამოუკიდებლობის საფუძველი, ფარული მოლაპარაკებების წარმოება ეს არის პირველ რიგში აბსოლუტურად უპასუხისმგებლო დამოკიდებულება საზოგადოების მიმართ, პირველ შეკითხვას სწორედ ეს აჩენს, რატომ იყო ფარული მოლაპარაკებები და რა განიხილეს ამ მოლაპარაკებების დროს და მეორე, ეს ხომ არ გაგვხდის კიდევ უფრო დამოკიდებულს რუსულ გაზზე, რაც ნიშნავს რომ ჩვენ მათ ვაბარებთ პოლიტიკურ ბერკეტს ზემოქმედებისთვის რუსეთის ფედერაციას”, - განაცხადა ალასანიამ.
