საპარლამენტო უმრავლესობის წევრი ირაკლი სესიაშვილის განცხადებით, პოლიტიკურმა პარტიებმა უნდა გაითავისონ, რომ ამ ქვეყანაში ძალადობა აღარ იქნება, - ამის შესახებ მან ,,რუსთავი 2”-ის მხარდამჭერთათვის პატიმრობის შეფარდების შეფასებასთან დაკავშირებით განაცხადა. მისი თქმით, გული სწყდება რომ ამ პირებს პატიმრობა მიესაჯათ, თუმცა სამართალდამცავი ორგანოები ვალდებული არიან ძალადობაზე რეაგირება მოახდინონ.
,,სამწუხაროა, რომ ზოგიერთი პოლიტიკური ძალა გარკვეულ ჯგუფს ძალადობისკენ მიმართულებას აძლევს. მე, ეს ნამდვილად არ მომწონს. მეტიც, გული მწყდება, რომ ამ ადამიანებს პატიმრობა მიუსაჯეს, რადგან უმჯობესია ძალადობის გარეშე მოვახერხოთ აზრის გამოხატვა და პოზიციის დაფიქსირება", - განაცხადა სესიაშვილმა და დასძინა, რომ "თუ ვინმეს ძალადობა ენატრება, მასზე, რა თქმა უნდა, სამართალდამცავი ორგანოები მოახდენენ ადეკვატურ რეაგირებას".
პარლამენტთან, 2 ოქტომბერს დეპუტატ დავით ლორთქიფანიძესა და აქციის მონაწილეებს შორის მომხდარი ინციდენტის შედეგად დაკავებულ პირებს, დღეს პატიმრობა შეეფარდათ.
