ქართველი ხალხი უნდა ამაყობდეს სამხედრო მოსამსახურეების სამსახურითა და წვლილით, რომელიც მათ საერთაშორისო მშვიდობისა და უსაფრთხოების საქმეში შეაქვთ, ამის შესახებ აშშ-ის ელჩმა საქართველოში იან კელიმ ვაზიანში, IV მექანიზირებული ბრიგადის სამწყობრო მოედანზე, ავღანეთის ისლამურ რესპუბლიკაში „მტკიცე მხარდაჭერის“ საერთაშორისო მისიაში ჩართვისთვის ქართული კონტინგენტის გაცილების ცერემონიალზე განაცხადა.
„ქართველი ხალხი უნდა ამაყობდეს სამხედრო მოსამსახურეების სამსახურითა და წვლილით, რომელიც მათ საერთაშორისო მშვიდობისა და უსაფრთხოების საქმეში შეაქვთ. საქართველო ასევე უნდა ამაყობდეს ქართველი ჯარისკაცების თავგანწირვით. სამწუხაროდ, ბოლო პერიოდში ეს პირველი კლასის რიგითი ყულჯანიშვილი გახდა.”, - განაცხადა ელჩმა.
იან კელიმ ყურადღება გაამახვილა აშშ- საქართველოს შორის წლების განმავლობაში ჩამოყალიბებულ სამხედრო თანაშრომლობაზე.
„მეამაყება, რომ ღონისძიებაში ამერიკელი საზღვაო ქვეითებიც მონაწილეობენ. ისინი ქართველ სამხედროებთან ერთად გადიან წვრთნას. უკვე შვიდი წელია ამერიკელი სამხედროები ავღანეთში ქართველი ჯარისკაცების მხარდამხარ ასრულებენ მისიას. მქონდა შესაძლებლობა პირადად მენახა და მინდა აღვნიშნო, რომ ეს სამხედროები მზად არიან ავღანეთში მისიის შესასრულებლად“, - განაცხადა იან კელიმ.
