ფრაქცია „ქართული ოცნების“ წევრის ზაქარია ქუცნაშვილის შეფასებით, უნდა დაინგრეს სტერეოტიპი, რომ საჯარო მოხელე პატიოსნად ვერ იმუშავებს, თუკი 2000-3000 ხელფასები არ ექნება. მისივე თქმით, მარეგულირებელი კომისიების წევრების 15-ათასიანი ხელფასები პატიოსნების საზომი არ არის.
პარლამენტის საპროცედურო საკითხთა კომიტეტი ქუცნაშვილის ინიციატივაზე იმსჯელებს, რომლის მიხედვით, დეპუტატი იანვრამდე პრემიების გაცემის შეზღუდვას ითხოვს.
„ამ ცვლილებების წინააღმდეგ ორი ნოდარი გამოდის - ხადური და ებანოიძე. რაც შეეხება ხადურის განცხადებას, ყველა ვალდებული ვართ, პატიოსნად ვიმუშაოთ, რადგან პატიოსნებით პრემია არ განისაზღვრება", - განაცხადა ქუცნაშვილმა.
შეგახსენებთ, ფინანსთა მინისტრი ზაქარია ქუცნაშვილის ინიციატივას ღია კარის მტვრევად აფასებს.
"მე მგონია, რომ ღია კარებს ვამტრევთ, პრემირების სისტემა მოწესრიგებულია მინისტრების დონეზე. რაც შეეხება ზოგადად შრომის ანაზღაურებას, არაერთხელ მითქვამს და კიდევ უნდა ვთქვა, რომ საჯარო სამსახურებში მუშაობენ ძალიან ღირსეული ადამიანები და მათ ღირსეული შრომის ანაზღაურება სჭირდებათ", - განაცხადა ხადურმა.
