იუსტიციის მინისტრი თეა წულუკიანი აცხადებს, რომ საქართველოს ხელისუფლება როგორც კი დარწმუნდება, რომ სააკაშვილმა მიიღო უკრაინის მოქალაქეობა, მას მყისიერად შეუწყდება საქართველოს მოქალაქეობა.
მისი თქმით, ოდესის გუბერნატორი უცნაური განცხადებებით გამოირჩევა, ამიტომ ყველა რისკი უნდა გამოირიცხოს.
„ამჟამად, უკრაინის ხელისუფლებისგან ველოდებით პასუხს, ნამდვილად მიიღო თუ არა სააკაშვილმა უკრაინის მოქალაქეობა. ეს ალბათ ასეც არის, რადგან პოროშენკოს ვებგვერდზე გამოქვეყნებულია მოქალაქეობის მინიჭების შესახებ გადაწყვეტილება. თუმცა, უნდა გამოირიცხოს ყველანაირი რისკი, რომ ეს მოქალაქეობა ძალაში არ შესულა. ოდესის გუბერნატორი უცნაური განცხადებებით გამოირჩევა, რომლის საფუძვლიანობის შემოწმება არავის ძალუძს. ამიტომ, ჩვენ როგორც კი დავრწმუნდებით, რომ მან მოქალაქეობა მიიღო და უკვე საბუთებიც აქვს, რა თქმა უნდა, მას მყისიერად შევუწყვეტთ საქართველოს მოქალაქეობას, რადგან ასეთია ქართული კონსტიტუცია და ქართული კანონი“, - დასძინა წულუკიანმა.
