საკრებულოს წევრი, ნაციონალური მოძრაობის წარმომადგენელი ირაკლი აბესაძე საპატრიარქოსთვის ბობოყვათის რეზიდენციის გადაცემასთან დაკავშირებით, მთავრობისგან დამატებით განმარტებებს მოითხოვს. იგი მიიჩნევს, რომ შესაძლოა ამ გადაწყვეტილებაში, პრემიერის ან ბიძინა ივანიშვილის ინტერესები იყოს ჩადებული.
"აბსოლუტურად გაუგებარია ბობოყვათის რეზიდენციის გაცვლა კრწანისის ტყე-პარკში, სადაც არანაირი მშენებლობა არ შეიძლება და ისიც, ფაქტობრივად, საპრივატიზებო ობიექტი არ არის. ამას სჭირდება დამატებითი განმარტებები ხელისუფლების მხრიდან. სხვა შემთხვევაში , იკვეთება ხელისუფლების მაღალი თანამდებობის პირების, პრემიერის, ან თუნდაც ყოფილი პრემიერის, ივანიშვილის ინტერესები", - განაცხადა აბესაძემ.
შეგახსენებთ, მთავრობამ საპატრიარქოს კრწანისის ტყე-პარკის სანაცვლოდ, ბობოყვათის რეზიდენცია გადასცა. რეზიდენციის მიმდებარე სანაპირო ზოლზე 11 ათას 810 კვადრატული მეტრი ფართობი, მასზე არსებული შენობა-ნაგებობებით, საპატრიარქოს უსასყიდლოდ გადაეცა. ხელშეკრულება საპატრიარქოსა და სახელმწიფოს შორის 49 წლის ვადით დაიდო.
ამავე განკარგულების მიხედვით, 21 სექტემბრის შემდეგ 60 დღის ვადაში საპატრიარქომ სახელმწიფოს უნდა დაუბრუნოს მის მფლობელობაში არსებული "კრწანისის ტყე-პარკის" 100 პროცენტი, რომელიც პრეზიდენტის განკარგულებით საპატრიარქოს 2010 წელს 1 ლარად გადაეცა.
საქართველოს მთავრობა ბობოყვათის რეზიდენციის გაყიდვას 25 მილიონად აპირებდა.
