რუსეთში რეალური ძალაუფლება არაფორმალურ სტრუქტურებში გაერთიანებულ ადამინთა ჯგუფს ეკუთვნის. ეს სტრუქტურები მრავალი ნიშნით ჰგავს დანაშაულებრივ დაჯგუფებას საკუთარი ლიდერებითა და „ნათლიმამებით“. ასეთი მოსაზრება გამოთქვა ანტლანტიკურ საბჭოში გამართულ დისკუსიაზე - „პუტინის სინდიკატი“ - ექსპერტმა რუსეთის საკითხებში ბრაიან უიტმორმა (Brian Whitmore).
"ამ ქვეყანაში გადაწყვეტილების მიღების პროცესი ბევრი თვალსაზრისით მუშაობს ისე, როგორც დანაშაულებრივი სინდიკატი, რამდენადაც გადაწყვეტილებას იღებს არა სახელმწიფო დუმა, არა მთავრობა, არამედ არაფორმალური სტრუქტურა", -აღნიშნა ექსპერტმა.
უიტმორმა აღნიშნა ,რომ რუსეთში გადაწყვეტილებას იღებს დაახლოებით 12 ადამიანი, რომელთაც უკავიათ საკვანძო პოზიციები და ჰყავთ საკუთარი ჯგუფები.
მათ ხელმძღვანელობს ე.წ. ”ნათლიმამა”, რომელიც წყვეტს ყველა სადავო საკითხს. ყველა ლიდერი რუსულ საზოგადოებაში მიღებული და პატიცემული ადამიანია.
მისივე თქმით, ეს სინდიკატი, თავს წარმოაჩენს როგორც სახელმწიფო.
იმის მტკიცებულებად, რომ სტრუქტურა დანაშაულებრივია, უიტმორმა განაცხადა - „სინდიკატი“ საკუთარი მიზნების მისაღწევად იყენებს მუქარას, დაშინებას, ძალადობრივ მეთოდებს. მას აქვს ყველა საჭირო ინსტრუმენტი. ამ სტრუქტურის კვების წყაროს კორუფცია წარმოადგენს.
”კორუფცია, როგორც მოვლენა, სამწუხაროდ არსებობს ყველგან, მათ შორის ევროპაში. მაგრამ, მე ვერ ვპოულობ ისტორიაში სხვა შემთხვევას, როდესაც სახელმწიფო იყენებს დანაშაულებრივ კორუფციას ისე, როგორც ამას აკეთებს რუსეთის ფედერაცია - ვლადიმერ პუტინის ხელმძღვანელობით”, - განაცხადა უიტმორმა.
უიტმორი რუსეთის საკითხებს 1990 წლიდან იკვლევს. ამჟამად იგი მუშაობს პრაღაში, ”რადიო თავისუფლებაში” და ძირითადად აშუქებს ევროპული უსაფრთხოების, ენერგეტიკის საკითხებს, სამხედრო მიმართულებას და რუსეთის შიდა პოლიტიკურ პროცესებს.
