ე.წ. კორტების სპეცოპერაციის საქმეზე, ყოფილი შსს მინისტრის ვანო მერაბიშვილის დაკითხვის საკითხი, შესაძლოა დღის წესრიგიდან მოიხსნას, - ამის შესახებ საქმის ადვოკატი დავით ხაჟალია აცხადებს.
მისი თქმით, ვანო მერაბიშვილი და ერეკლე კოდუა მოტივთან დაკავშირებით უნდა დაეკითხათ, ბრალდების მხარის მოტივი კი, თავად ბრალდების მხარის მოწმეებმა ამორიცხეს.
,,სოდ-ის მაშინდელმა თანამშრომლებმა თქვეს, რომ ხუბულოვი არ ყოფილა მათი აგენტი. აქედან გამომდინარე, მოტივი იმისა, რომ ფირცხალავამ ძმის გამო იძია შური, გამოირიცხა. ამავე დროს, ბრალდების მხარე ამბობს, რომ არავინ იცოდა ვინ იყვნენ ის პირები, ვის მიმართაც ჩატარდა ღონისძიება. ვფიქრობ, რომ სასამართლო მიიღებს გამამართლებელ გადაწყვეტილებას მკვლელობის ბრალდების ნაწილში“, - განაცხადა ადვიკატმა.
საქმის პროკურორის ამირან გულუაშვილის თქმით, ბრალდების მხარეს მიაჩნია, რომ წარმოდგენილი მტკიცებულებებით დასტურდება, რომ ირაკლი ფირცხალავას ხუბულოვის მიმართ პირადი ინტერესი ჰქონდა, რაც უკავშირდება მისი ძმის მხრიდან ნარკოტიკების გასაღებას.
ე.წ. კორტების სპეცოპერაციის საქმეზე ბრალდებულ ყოფილი მაღალჩინოსნების საქმეზე დღეს ბრალდების მხარემ წერილობითი მტკიცებულებები გამოიკვლია.
შემდეგი სხდომა 25 სექტემბერს 11:00 საათზე გაიმართება.
