,,ქართული ოცნების” წევრი ზაქარია ქუცნაშვილი მიიჩნევს, რომ საქართველო რეგიონში - შედარების თვალსაზრისით კარგ მდგომარეობაშია. ეროვნული ვალუტის გაუფასურების შეფასებისას დეპუტატი შედარებისთვის თურქეთს ასახელებს, სადაც მისი ინფორმაციით, დოლარის შეძენა სამ ლირად ხდება.
,,ქართული ეკონომიკა არის პატარა და ღია ეკონომიკა. იმ ქვეყნებში, სადაც პატარა და ღია ეკონომიკაა, ის განმსაზღვრელ გავლენას განიცდის რეგიონალურ ჭრილში ცვლილებების გამო. თქვენ უნდა ნახოთ, რა ხდება თურქეთის რესპუბლიკაში. ლირა და ლარი დაახლოებით ერთნაირი თანაფარდობის იყო დოლართან მიმართებით, დღეის მდგომარეობით, ერთ დოლარი თურქეთში შეგიძლიათ შეიძინოთ სამ ლირად. ასე რომ, კიდევ კარგ მდგომარეობაში ვართ რეგიონალური ფაქტორებიდან გამომდინარე, თუ ამას შეიძლება, შედარების თვალსაზრისით, კიდევ კარგი მდგომარეობა ეწოდოს”, - განაცხადა ქუცნაშვილმა.
სებ-ის საიტზე დღეს გამოქვეყნებული ინფორმაციის თანახმად, 11 სექტემბრის ოფიციალური კურსით, 1 აშშ დოლარი/ 2.4014 ლარია, ხოლო 1 ევრო/ 2.6872 ლარი ღირს. შესაბამისად, ლარი დოლართან მიმართებაში 0.0138 პუნქტით, ხოლო ევროსთან მიმართებაში 0.0250 პუნქტით გაუფასურდა. 10 სექტემბრის, მდგომარეობით კი 1 დოლარი/ 2.3876 ლარი, ხოლო 1 ევრო/ 2.6622 ლარია.
