ექსპერტი ეკონომიკის საკითხებში რომან გოცირიძე მიიჩნევს, რომ სებ-ის პრეზიდენტის მიერ გაკეთებული მოწოდება მოსახლეობისთვის საკრედიტო ვალების რესტრუქტურიზაციასთან დაკავშირებით პოპულისტურია და იგი კენჭებს მთავრობის, პარლამენტისა და ზედამხედველობის ბოსტანში ისვრის.
მისი თქმით, კომერციული ბანკები "არაუფლებამოსილი სუბიექტის შეგონებას ერთ ყურში შეუშვებენ და მეორეში გაატარებენ”.
,,საქართველოს ეროვნული ბანკის მოწოდება კომერციული ბანკებისადმი სესხების რესტრუქტურიზაციის შესახებ, ცოტათი თუ განსხვავდება პარტიებისა თუ სხვა პირების მიერ გაკეთებული მსგავსი განცხადებებისაგან. არ არის ეროვნული ბანკი დღეს ის, რაც გუშინ იყო. გაიტანეს ზედამხედველობის სამსახური. კომერციული ბანკებიც "არაუფლებამოსილი სუბიექტის" შეგონებას ერთ ყურში შეუშვებენ და მეორეში გაატარებენ.
დღეს ეროვნული ბანკი თავისი პოპულისტური განცხადებით კენჭებს მთავრობის, პარლამენტისა და ზედამხედველობის ბოსტანში ისვრის. როლები შეიცვალა. თუ დღემდე მას ესხმოდნენ თავს, ახლა სხვებს უწევთ თავის დაცვა.
ეს არის პირველი თვალნათელი მაგალითი საბანკო ზედამხედველობის ეროვნული ბანკიდან ჩამოცილების შემდეგ როლების ტრანსფორმაციისა.
იქნებ ეს ჯანსაღი კონკურენციაა? არა მგონია. ეს ეროვნული ბანკის პასუხიმგებლიბის არეალის შემცირების შედეგია, რომელიც სტიმულს აძლევს უპასუხისმგებლო ინიციატივების შეთავაზებას”, - აცხადებს ექსპერტი.
