უკრაინაში მთავრობა რომ უნდა შეიცვალოს, ამის მოთხოვნა არა მხოლოდ მიშას, არამედ მთელს უკრაინულ საზოგადოებას აქვს, რადგან ვერ ხედავდნენ იმ რეფორმებს, რასაც იაცენიუკი და მისი გუნდი ჰპირდებოდნენ მოსახლეობას, - ამის შესახებ ,,ჯი-ეიჩ-ენთან” საუბარში უკრაინაში მოღვაწე ქართველი ბლოგერი, დამოუკიდებელი ჟურნალისტი, წარსულში უკრაინაში საქართველოს საელჩოს პრესატაშე ბაჩო ქორჩილავა აცხადებს.
ოდესის ოლქის გუბერნატორის მიხეილ სააკაშვილის უკრაინაში შესაძლო გაპრემიერებასთან დაკავშირებით, ქორჩილავა აცხადებს, რომ არსებობს მაღალი შანსები ეს ოქტომბრის თვეში მართლაც მოხდეს.
,,მიხეილ სააკაშვილის შესაძლო პრემიერობასთან დაკავშირებით, საზოგადოებაში კარგი განწყობა არსებობს, რადგან მოქმედი პრემიერი და მთავრობა რეალურ რეფორმებს არ ახორციელებენ. ერთადერთი, რაც გაკეთდა, ესაა საპატრულო პოლიცია, რომელიც ასევე მიხეილ სააკაშვილს, ეკა ზღულაძეს და ქართულ გუნდს უკავშირდება. ასევე, მეორე საკითხია ის, რომ პოლიტიკოსებს ძალიან ეშინიათ მიშას წინააღმდეგ წასვლა, რადგან ნებისმიერი დაპირისპირება მასთან, იწვევს მათი რეიტინგის დაცემას მოსახლეობის უმრავლესობაში. ის, რომ უკრაინული მთავრობა უნდა შეიცვალოს ამის მოთხოვნა არა მხოლოდ მიშას, არამედ მთელს უკრაინულ საზოგადოებას აქვს, რადგან ვერ ხედავდნენ იმ რეფორმებს რასაც იაცენიუკი და მისი გუნდი ჰპირდებოდნენ. მართალია მიშამ თქვა, რომ პრემიერ-მინისტრობა არ აინტერესებს და ოდესაზეა გადართული, მაგრამ ჩემი დაკვირვებით მას აქვს პრემიერობის ამბიციები და მის მიმართ მხარდაჭერაც საკმაოდ დიდია”, _ აღნიშნავს ბაჩო ქორჩილავა.
იგი უკრაინის მთავრობაში ცვლილებებს ადგილობრივი არჩევნებისთვის ვარაუდობს, რომელიც 25 ოქტომბერს არის დაგეგმილი.
,,თუმცა, სიტუაცია აქ ისეთია, სამთავრობო ცვლილებები ნებისმიერ დროს შეიძლება მოხდეს. კიდევ ერთხელ ვამბობ, რომ საზოგადოებაში დიდი მოთხოვნაა მიხეილ სააკაშვილი გახდეს პრემიერი. ამას პეტიციაც ადასტურებს” _ დასძინა ქორჩილავამ.
შეგახსენებთ, გსურთ თუ არა სააკაშვილი პრემიერ-მინისტრად? - პეტიციას, რომელიც უკრაინის პრეზიდენტის ოფიციალურ ვებ-გვერდზეა გამოქვეყნებული, ხელი უკვე 25 360-მა ადამიანმა მოაწერა, რაც იმას ნიშნავს, რომ პოროშენკო საინიციატივო ჯგუფის წინადადებას განიხილავს. თავად სააკაშვილმა რამდენიმე დღის წინ გავრცელებული ინფორმაცია პრემიერად მისი შესაძლო დანიშვნის შესახებ კატეგორიულად უარყო, გვიან ღამით კი ტელეარხ აი-სი-ტი-ვი-სთვის მიცემულ ინტერვიუში ოდესის გუბერნატორმა ღიად განაცხადა, რომ სახელმწიფო აპარატის დემორალიზაციის გამო შესაძლოა უკრაინაში მთავრობა შეიცვალოს.
საქართველოს ექსპრეზიდენტის თქმით, უკრაინელი პოლიტიკოსები ლეგიტიმურობას კარგავენ, რაზეც ბოლო სოციალური გამოკითხვებიც მოწმობს, მუკაჩევოსა და უმაღლეს რადასთან გასულ თვეში მომხდარი ინციდენტები კი იმის მანიშნებელია, რომ სამართალდამცავი სტრუქტურები არაეფექტურად მუშაობენ.
