უშიშროების საბჭოს ყოფილი მდივანი ეკა ტყეშელაშვილი ,,ჯი-ეიჩ-ენთან” საუბარში აცხადებს, რომ ყურადსაღებია ის განცხადებები, რომელიც თბილისში მიმდინარე საერთაშორისო კონფერენციის ფარგლებში ქვეყნის ხელისუფლების მიმართ გაჟღერდა. როგორც ტყეშელაშვილი აცხადებს, საქართველოს პარტნიორები ქვეყანაში არსებული პრობლემების შესახებ ღიად საუბრებენ.
,,ნიშანდობლივია თუ ვინ აკეთებს მსგავსი ტიპის განცხადებებს. განცხადებები გაკეთა იმ ადამიანებისა და იმ ქვეყნის წარმომადგენლების მხრიდან, რომლებიც საქართველოს დიდი და მყარი მხარდამჭერები არიან, როგორც ქვეყნის წარმატების, ასევე, ევროინტეგრაციის გზაზე. ამიტომ, მეგობრებისა და მხარდამჭერების მხრიდან მსგავსი ტიპის შეფასება გაცილებით უფრო ყურადსაღებია, რადგან უკვე შეფარვის გარეშე, პირდაპირ სიგნალს აძლევენ ხელისუფლებას. ქვეყანა, როდესაც ერთის მხრივ სურს ინტეგრაცია ევროპულ სტრუქტურებში, ხოლო მეორე მხრივ, დემოკრატიის თვალსაზრისით, ფუნდამენტური ინსტიტუტების ჩამოშლას ახორციელების, არის ფუნდამენტური პრობლემის შემცველი ევროინტეგრაციის გზაზე. როგორც ჩანს, შეფასების თვალსაზრისით ეს არის უკვე ისეთი ფაზაა ჩვენი მეგობრების მხრიდან, როდესაც იმდენად შეუფარავია ხარისხობრივად პრობლემა, რომ ღიად პირდაპირი მესიჯების სახით ხდება სიგნალის მიწოდება ხელისუფლებისთვის”, -აცხადებს ტყეშელაშვილი ,,ჯი-ეიჩ-ენთან” საუბარში.
კითხვაზე - ქვეყანაში არსებული ვითარების გათვალისწინებით, ელოდება თუ არა პროგრესს ვარშავის სამიტზე, ტყეშელაშვილი განმარტავს:
,,ჯერ კიდევ აქვს დრო და შესაძლებლობა ქვეყანას იმისთვის, რომ პროცესი წარმატებულად წარმართოს. ამიტომ, დიდი მნიშვნელობა აქვს, როდის ხდება მნიშვნელოვანი სიგნალების გაჟღერება ჩვენი ხელისუფლების წინაშე”.
თბილისში მიმდინარე საერთაშორისო კონნფერნციაზე ევროპელი ლიდერები არაფორმალურ მმართველობასა და პოლიტიკური ოპონენტების დაპატიმრებებზე საუბრობენ.
