ჩვენ დღეს მზად ვართ უფრო აგრესიული მონეტარული პოლიტიკის გასატარებლად, - ამის შესახებ ეროვნული ბანკის პრეზიდენტმა გიორგი ქადაგიძემ ჟურნალისტებს ლარის კურსის გაუფასურებასთან დაკავშირებით განუცხადა.
მისი თქმით, ბაზრის მონაწილეების ნდობის მოსაპოვებლად ძალიან მნიშვნელოვანია, მთავრობამ დააფიქსიროს თავისი პოზიცია რეფინანსირების ინსტრუმენტთან და მთლიანად მონეტარულ პოლიტიკასთან დაკავშირებით.
„კურსის გაუფასურება გამოიწვია იმ მილიარდი დოლარის შემოდინების დანაკლისმა, რომელიც ბოლო წლის განმავლობაში დააკლდა ჩვენს ეკონომიკას. შესაბამისად, გაუფასურებულმა კურსმა შეამცირა იმპორტი იგივე ოდენობით და დღეს ჩვენ შეგვიძლია ვთქვათ, რომ საგადამხდელო ბალანსიდან ანუ შემოდინების ნაწილი უკვე ასახულია იმპორტის შემცირებაში, შესაბამისად ამ მიმართულებით კურსზე ზეწოლას არ ველოდებით.
ჩვენ მზად ვართ დღეს, უფრო აგრესიული მონეტარული პოლიტიკის გასატარებლად, თუ ამის საჭიროება დადგება, სხვადასხვა მიმართულებით, თუმცა იმისათვის, რომ ბაზრის მონაწილეებს ჰქონდეთ ნდობა ჩვენი ინსტრუმენტების მიმართ, რაც არის აუცილებელი იმისთვის, რომ მივაღწიოთ წარმატებას, ძალიან მნიშვნელოვანია, რომ მთავრობამ, განსაკუთრებით ეკონომიკური ბლოკის მინისტრებმა დააფიქსირონ თავისი პოზიცია რეფინანსირების ინსტრუმენტთან და მთლიანად მონეტარულ პოლიტიკასთან დაკავშირებით, რომ ერთხელ და სამუდამოდ წერტილი დავუსვათ ამ საკითხს. როგორც კი ამ საკითხს დავუსვამთ წერტილს, ჩვენ შეგვეძლება, უფრო პრაქტიული ქმედებები გავაკეთოთ“, - აღნიშნა ქადაგიძემ.
