"ვინ შავი ლაქაა, ვინ თეთრი და ვინ საერთოდ გადღაბნილი ლაქა, ამას გადაწყვეტს ამომრჩეველი და ამას საზოგადოება შეაფასებს”, - ასე აფასებს ..რესპუბლიკური პარტიის” წევრი დავით ზურაბიშვილი საფინანსო-საბუჯეტო კომიტეტის თავმჯდომარის, თამაზ მეჭიაურის განცახდებას.
ზურაბიშვილი მეჭიურს თანაგუნდელად აღარ განიხილავს.
,,სამომავლოდ ბუნებრივია მეჭიაურს თანაგუნდელად ნამდვილად არ განვიხილავ, რადგან ასეთი შეხედულებები არ შეიძლება გქონდეს. მცდელობები, რომ მახვილსიტყვაობით შეურაცხყოფა მოგაყენოს, ამაზე აყოლა არ ღირს. ბატონ მეჭიაურის რეპუტაციას ვერავინ მიაყენებს ისეთ შეურაცხყოფას, როგორსაც თავად აყენებს თავისი განცხადებებით,“ - აცხადებს დავით ზურაბიშვილი.
საფინანსო საბიუჯეტო კომიტეტის თავმჯდომარე პრეზიდენტის მისამართით გაკეთებული განცხადებების გამო თანაგუნდელებმა გააკრიტიკეს. დღეს კი თამაზ მეჭიაურმა ,,რესპუბლიკური პარტიის” წევრებს უპასუხა.
,,ისინი მედიდურად უყურებენ თავის კოლეგებს. ვსაუბრობ ძმებ ბერძენიშვილზე, თინიკოც გარკვეულ წილად და დავით ზურაბიშვილიც. ბედის უკუღმართობა, რომ არა მართლა რა მინდოდა მაგის გვერდით. რატომღაც ჰგონიათ რომ დიდი გამოცდილება, თუ დამსახურებები აქვთ. სამი მოწვევის პარლამენტარი ვარ და თავი არავისთვის დამიმადლებია. პირადად ჩემთვის რამდენიმე მათგანის ქმედება არის აბსოლუტურად მიუღებელი, იმიტომ რომ მათ მე შეურაცხყოფა მომაყენეს, მე კიდე ვფიქრობ რომ მათთვის არანაირი შეურაცხყოფა არ მიმიყენებია. შეიძლება ჰგონიათ, რომ რადგან მე კურსელი ვარ ბიძინა ივანიშვილის საიდანღაც ვიმართები, მე ღმერთის წინაშე შემიძლია დავიფიცო რასაც ვაკეთებ მხოლოდ ჩემი შეგნებით.“ - განაცხადა თამაზ მეჭიაურმა.
