სებ-ის პრეზიდენტის გიორგი ქადაგიძის განცხადებით, ზედამხედველობის სამსახურის გამოყოფა იყო მცდარი გადაწყვეტილება, მაგრამ უნდა გაგრძელდეს ძალიან აქტიური მუშაობა. როგორც ქადაგიძემ ჟურნალისტებთან განაცხადა, დღეს ყველაზე მნიშვნელოვანი პრობლემაა ის, რაც ლარის გაუფასურებამ მოუტანა მოქალაქეებს.
,,ჩვენ ყველამ ერთად უნდა ვიმუშაოთ იმისთვის, რომ რაც მთავარია აღდგეს სავალუტო შემოდინებები ქვეყანაში, რომელმაც უნდა გამოიწვიოს საბოლოო ჯამში ჩვენი მოქალაქეებისთვის შვება როგორც ეკონომიკური, ისე სოციალური თვალსაზრისით", - განაცხადა გიორგი ქადაგიძემ.
მისივე თქმით, ლარის გაუფასურების პროცესში ეროვნული ბანკის პოლიტიკის სისწორე აღნიშნულია ყველა საერთაშორისო ორგანიზაციის მიერ, ასევე ყველა ავტორიტეტული ეკონომისტის მიერ - იქნება ეს სავალუტო ფონდი, მსოფლიო ბანკი თუ სხვა. ქადაგიძის განცხადებით, კითხვა იმასთან დაკავშირებით, სწორი პოლიტიკა გაატარა თუ არა ეროვნულმა ბანკმა, საერთოდ არ არსებობს.
