ცესკოს ყოფილი თავმჯდომარის ზურაბ ხარატიშვილის განმარტებით, კანდიდატის დასახელების გარეშე ,,ნაცმოძრაობას” უფლება აქვს გამოიყენოს უფასო საეთერო დრო და ამით ისინი კანონს არ დაარღვევენ. Aამის შესახებ, ჯი-ეიჩ-ენთან” საუბარში ხარატიშვილმა აღნიშნა.
,მე როგორც ვიცი, ამით კანონს არ არღვევენ, თუ ,,ნაციონალები” კანონს არღვევენ ცესკო რეგისტრაციის უფლებას არ მისცემდა”. ისინი საკუთარ უფლებას იყენებენ პოლიტიკური მიზნებისთვის”, - განაცხადა ხარატიშვილმა.
კითხვაზე ყოფილა თუ არა მსგავსი პრეცედენტი, ხარატიშვილი აცხადებს:
,,ჩემი თავმჯდომარეობის პერიოდში არ ყოფილა, მანამადე ვერ გეტყვი”, -აცხადებს ზურაბ ხარატიშვილი.
ერთიანი ნაციონალური მოძრაობა მარტვილისა და საგარეჯოს საარჩევნო ოლქებში 31 ოქტომბერს დაგეგმილ პარლამენტის შუალედურ არჩევნებში მონაწილეობას არ იღებს, რაც ნიშნავს, რომ არ წარადგენს კანდიდატებს და არ დანიშნავს წევრებს საარჩევნო კომისიებში.
როგორც ენმ-ს მიერ გავრცელებულ განცხადებაშია აღნიშნული, ქვეყანაში შექმნილი უმძიმესი ეკონომიკური კრიზისის დაძლევას, ოჯახების გაღარიბების შეჩერებას, სწორი პოლიტიკის გატარებას და ქვეყნის წინსვლას ბიძინა ივანიშვილის ხელისუფლების შეცვლა სჭირდება არა მხოლოდ 2 საარჩევნო ოლქში, არამედ მთელ საქართველოში.
”იმავდროულად, ერთიანმა ნაციონალურმა მოძრაობამ გაიარა საარჩევნო რეგისტრაცია, რათა გამოიყენოს კანონით მინიჭებული უფასო საეთერო დრო, რათა საზოგადოებას კარგად გააცნოს 31 ოქტომბრის არჩევნებისათვის ბოიკოტის გამოცხადების ზემოაღნიშნული მიზეზები?,- აცხადებენ პარტიაში.
პარლამენტისა და საკრებულოს შუალედური არჩევნები ცენტრალური საარჩევნო კომისიის გადაწყვეტილებით 31 ოქტომბერს გაიმართება. პარლამენტის შუალედური არჩევნები მაჟორიტარული საარჩევნო სისტემით, #11 საგარეჯოს და #65 მარტვილის ოლქებში ჩატარდება, ხოლო ადგილობრივი თვითმმართველობის წარმომადგენლობითი ორგანოს, საკრებულოს შუალედური არჩევნები დმანისის, ვანის, ხობის და საგარეჯოს ადგილობრივ საარჩევნო ოლქებში.
