საქართველოში ტექნოლოგიური ინსტიტუტის შექმნასთან დაკავშირებით, პარლამენტში შესულ კანონპროექტს ექსპერტი ეკონომიკის საკითხებში რომან გოცირიძე ეხმაურება. მისი თქმით, ეს არის ავანტურისტული პროექტი, რომელიც აუცილებლად ,,ჩაფლავდება”
,,მთავრობა, რომლის ბიუჯეტის შემოსავლების 20 პროცენტი ვალებით ივსება და ვერ აუდის უამრავ პრობლემას, ახალ ავანტურისტულ პროექტს იწყებს. საკმაოდ საეჭვო საფუძვლის მქონე ადრონული თერაპიის იდეის ირგვლივ ტექნოლოგიურ ინსტიტუტს აფუძნებს, თითქოს ამის სამეცნიერო, ფინანსური ან სხვა პოტენციალი გაგვაჩნდეს.
გრანტებით და კერძო ფულით მოხდება დაფინანსებაო. იმასაც ვნახავთ, თუ რა მალე მოხდება ბიუჯეტიდან ფულის ფლანგვა " მოსამზადებელი სამუშაოების" დასაწყებად.
ხუთიოდე წლის შემდეგ, როცა ეს წინასწარგანწირული ექსპეტიმენტი ჩაფლავდება, ვის უნდა
მოვთხოვოთ პასუხი. არა მგონია, მაშინ ამ მთავრობის რომელიმე წევრის გვარსახელი წესიერად ემახსოვროს ვინმეს” - აცხადებს რომან გოცირიძე და დასძენს, რომ ხელისუფლება, რომელიც ვერ გრძნობს პრიორიტეტებს, ცუდ დღეში ჩააგდებს ქვეყანას.
შეგახსენებთ, კანონპროექტის მიზნად სახელდება ტექნოლოგიური ინსტიტუტის - ადრონული თერაპიის მეგაპროექტის გარშემო თანამედროვე ტექნოლოგიების განვითარების სამეცნიერო-საგანმანათლებლო ცენტრის შექმნა და ფუნქციონირება.
პროექტის მიხედვით, ტექნოლოგიური ინსტიტუტის ფუნქციებია: - ადრონული თერაპიის მეგაპროექტის გარშემო სამეცნიერო კვლევების განვითარებისათვის ხელისშეწყობა; ფუნდამენტური კვლევების მიმართულებების განსაზღვრა და საერთაშორისო აღიარების მოპოვება, სტუდენტების პიროვნული პოტენციალის რეალიზების, შემოქმედებითი უნარ-ჩვევების განვითარების, თანამედროვე მოთხოვნათა შესატყვისი კომპეტენციების გამომუშავებისათვის ხელისშეწყობა; მკვლევართა მომზადება და მათთვის თანამედროვე სამეცნიერო-ექსპერიმენტული კვლევების პირობების შექმნა.
