„ყოფილ მძღოლს რომ ყოფილი მძღოლი უწოდო, ყოფილ ფეხბურთელს ყოფილი ფეხბურთელი, შეცდომაა? პრეზიდენტის უმადურობას ვგულისხმობდი და არა რომელიმე „ენჯეოს“ შეურაცხყოფას” , - აცხადებს პარლამენტის საფინანსო საბიუჯეტო კომიტეტის თავმჯდომარე თამაზ მეჭიაური მისი გუშინდელი განცხადების კომენტირებისას.
მან ჟურნალისტებთან განაცხადა, რომ ბოდიშს მხოლოდ ბიძინა ივანიშვილს მოუხდის, თული მისი განცხადება ყოფილ პრემიერს დისკომფორტს უქმნის.
,,იმ „ენჯეოებში“ არის ხალხი, რომლებსაც დიდ პატივს ვცემ და მიმაჩნია, რომ ნამდვილად სახელმწიფოებრივ საქმეებს აკეთებენ და არიან ისეთებიც, რომლებიც გარედან იმართებიან და შეიძლება, მთლად სახელმწიფოებრივ საქმესაც არ აკეთებენ. მივანიშნე, რომ მარგველაშვილი ერთ-ერთი „ენჯეოშნიკი“ იქნებოდა, რომელმაც ქსოვა იცის და რომ არა, ბიძინა ივანიშვილი, რომელსაც დღეს სულ აკრიტიკებდნენ, ქვეყნის დაქცევას აბრალებენ. მათ ვუთხარი, რომ ამაში კი არ არის დამნაშავე რაშიც დებთ ბრალს, არამედ იმაში, რომ მან ქადაგიძე დატოვა თავის თანამდებობაზე-თქო. ბოდიშს მოვიხდი. თუ ბიძინას ჩემი გამონათქვამი დისკომფორტს უქმნის, შემიძლია ბოდიში მას მოვუხადო და არა - სხვას“, - აღნიშნა დეპუტატმა.
თამაზ მეჭიაურმა გუშინ განაცხადა, რომ პრეზიდენტი გიორგი მარგველაშვილი ვეტოთი ნერვებს მოსახლეობასა და დეპუტატებს უშლის. „ბიძინა ივანიშვილს იმაში დავადანაშაულებ, რომ მან ერთ „ენჯეოელ სოროსელს“, რომელსაც საქსოვი ჩხირები ეჭირა, ის ხელიდან გააგდებინა და ვეტოთი აღჭურვა, რომლითაც ნერვებს გვიშლის ჩვენც და მოსახლეობასაც“, - განაცხადა მეჭიაურმა.
