თავისუფალი და აგრარული უნივერსიტეტების ბიზნესსკოლის დეკანი გიგა ბედინეიშვილი აცხადებს, რომ ძნელია გაიგო საკადრო ცვლილებები რეალურად რატომ განხორციელდა. მისი თქმით, ეკონომიკურ გუნდში ცვლილებები უნდა განხორციელებულიყო, თუმცა მისთვის შემაშფოთებელი საგარეო საქმეთა ამჟამინდელი მინისტრის განცხადება გახდა, როდესაც გიორგი კვირიკაშვილმა ქვეყნის პირველი დიპლომატის რანგში ყურადღება ევრაზიული სივრცის ათვისებაზე გაამახვილა.
”მგონია, რომ ნაწილობრივ მაინც ეს ცვლილება არის აღიარება იმისა, რომ არსებული ეკონომიკური პოლიტიკა იყო გაუგებარი, ამორფული და აბსოლიტურად არაეფექტური. ეკონომიკის სამინისტროში რაღაც უნდა შეცვლილიყო. მეორეს მხრივ, მე ცოტა არ მომეწონა ის, რაც გიორგი კვირიკაშვილმა თქვა თავის ახალ თანამდებობაზე წარდგენის შემდეგ. მან რატომღაც ევრაზიული სივრცე ახსენა, როგორც ერთ-ერთი პრიორიტეტი. რაც მე თუ მკითხავთ არის ძალიან შიშისმომგვრელი, როდესაც დასავლური ორიენტაციიდან უცებ გადავდივართ ევრაზიულ ორიენტაციაზე. ეს ძალიან ცუდია. მე მგონია, რომ ეს გადაადგილება აღიარებაა, როგორც არასწორი ეკონომიკური პოლიტიკის, ასევე მეშინია, რომ ეს შესაძლოა იყოს სხვა ორიენტირების დაწყების საფუძველი საგარეო პოლიტიკაში”,- აცხადებს გიგა ბედინეიშვილი ,,ჯი-ეიჩ-ენთან” საუბარში.
მისი განმარტებით, ახლა საქართველოს მიმართულება მარტო დასავლური პოლიტიკა არ იქნება და იქნება ასევე ევრაზიულ სავაჭრო კავშირებზე მიბმული.
”როდესაც საგარეო საქმეთა მინისტრი გამოდის და თავისავე პირველ განცხადებაში ამბობს, რომ ევრაზიული სივრცის უკეთ ათვისება არის მნიშვნელოვანი, და თან ამბობს ასეთ სიტყვებს: გარდა პროდასავლური ორიენტაცია, ე.ი. ის მეუბნება, რომ ახლა მიმართულება მარტო დასავლური პოლიტიკა არ იქნება და იქნება ასევე ევრაზიულ სავაჭრო კავშირებზე მიბმული.
ეს ჩემთვის ძალიან შემაშფოთებელია. როდესაც საუბარი იყო იმაზე, რომ ეს ხელისუფლება ნაკლებად არის დასავლური ორიენტაციის, ახლა ამის ფორმალიზება ხდება”- აცხადებს ბედინეიშვილი.
მისივე თქმით, სახელმწიფოს მიერ ეკონომიკაში ჩარევას ცუდის გარდა არაფერი არ მოაქვს. ექსპერტი მიჩნევს, რომ ეკონომიკაში სახელმწიფოს ჩარევა უნდა იყოს მაქსიმალურად შემცირებული.
”ეს ხელისუფლება კი სულ მოწოდებულია იმისკენ , რომ ცხვირი ჩაყოს რაც შეიძლება მეტად ეკონომიკაში, მაშინ როდესაც ჩვენ გვინდა ნაკლებად იყოს მთავრობის ჩართულობა ეკონომიკის განვითარებაში. ამიტომ ქუმსიშვილი იქნება, კვირიკაშვილი თუ ხადური ამას დიდ ცვლილებების მოხდენა არ შეუძლია, რადგანაც ეს ხელისუფლება ფილოსოფიურად მომართულია ეკონომიკაში ჩარევისკენ და სიტუაციის გართულებისკენ”,- აცხადებს ბედინეიშვილი.
შეგახსენებთ, რომ დღეს მთავრობაში საკადრო ცვლილებები განხორციელდა და ეკონომიკისა და მდგრადი განვითარების უკვე ყოფილი მინისტრი საგარეო საქმეთა მინისტრად დაინიშნა, ხოლო თბილისის ვიცე-მერი კი ეკონომიკისა და მდგრადი განვითარების მინისტრად წარადგინეს.