გიორგი კვირიკაშვილის მინისტრობის დროს დაწყებული ყველა პროექტი გაგრძელდება და წარმატებით დასრულდება, - აღნიშნულის პირობას ეკონომიკისა და მდგრადი განვითარების ახალი მინისტრი დიმიტრი ქუმსიშვილი დებს.
ქუმსიშვილის განაცხადებით, ქვეყნის სტაბილური ეკონომიკური განვითარებისათვის დარგობრივი ეკონომიკური კურსის უწყვეტობა უმნიშვნელოვანესი წინაპირობაა.
”მინდა მადლობა გადავუხადო საქართველოს პრემიერ-მინისტრს ირაკლი ღარიბაშვილს და ვიცე-პრემიერს გიორგი კვირიკაშვილს გამოცხადებული ნდობისათვის. ქვეყნის სტაბილური ეკონომიკური განვითარებისათვის უმნიშვნელოვანესია დარგობრივი ეკონომიკური კურსის უწყვეტობა. მე ახლა ვგრძნობ კიდე უფრო დიდ პასუხისმგებლობას რათა ყველა ის პროექტი და რეფორმა, რომელიც წამოწყებულია ბატონო ირაკლი ღარიბაშვილისა და ბატონი გიორგი კვირიკაშვილის მიერ იყოს წარმატებული, გაგრძელდეს და წარმატებით დასრულდეს”,- აღნიშნა დიმიტრი ქუმსიშვილმა.
ეკონომიკისა და მდგრადი განვითარების ახალი მინისტრი იმ პრიორიტეტებსაც ასახელებს, რომელზედაც ინტენსიურად იმუშავებს. ესენია:
კერძო სექტორის წახალისება, ახალი სამუშაო ადგილების შექმნა, პირდაპირი უცხოური ინვესტიციების მოზიდვა, ტურიზმის სფეროს განვითარება, ექსპორტზე ორიენტირებული პროდუქციისა და მომსახურების წარმოებაში საქართველოს პოტენციალის ამაღლება, ქვეყნის სატრანზიტო ფუნქციის გაძლიერება, ევროკავშირთან ღრმა და ყოვლისმომცველი თავისუფალი სავაჭრო სივრცის შესახებ შეთანხმების ფარგლებში განსახორციელებელი რეფორმების გატარება, საპენსიო რეფორმა, ქვეყნის ინტერნეტიზაცია, სახელმწიფო რეფორმის ეფექტური მართვა.
”ეს ის პრიორიტეტებია, რომელზედაც მუშაობა გაგრძელდება”,- განაცხადა ქუმსიშვილმა.
შეგახსენებთ, რომ დღეს პრემიერ-მინისტრმა მთავრობაში საკადრო გადადგილებების შესახებ განაცხადა და როგორც სახელმწიფო კანცელარიაში გამართულ ბრიფინგზე გახდა ცნობილი, ეკონომიკისა და მდგრადი განვითარების უკვე ყოფილი მინისტრი გიორგი კვირიკაშვილი მუშაობას საგარეო საქმეთა მინისტრის პოსტზე გააგრძელებს.
