,,ნაციონალური მოძრაობის” აღმასრულებელი მდივნის სერგო რატიანის განცხადებით, ხელისუფლება შუალედური არჩევნებისთვის ფინანსებსა და რესურსებს ტყუილად ხარჯავს. პრემიერ-მინისტრის მიერ, შუალედური არჩევნებისთვის კანდიდატების წარდგენის შესახებ რატიანმა ,,ჯი-ეიჩ-ენთან” განაცხადა, რომ ქვეყანაში შექმნილი მდგომარეობიდან გამომდინარე, აუცილებელია ვადამდელი არჩევნების ჩატარება.
,,დღევანდელი ხელისუფლება სრულიად არაადეკვატურია. შუალედურ არჩევნებს საყოველთაო ბოიკოტი გამოუცხადა ყველა პარტიამ. ქვეყანაში შექმნილია პოლიტიკური, ეკონომიკური კრიზისი.. აქედან გამომდინარე, დროა ხელისუფლება გადადგეს, დაინიშნოს ვადამდელი არჩევნები. შესაბამისად ხელისუფლება შუალედური არჩევნებისთვის ტყუილად ხარჯავს როგორც თანხებს ისე რესურსებს, რადგან ის, როგორც პოლიტიკურ, ისე ეკონომიკურ მდგომარეობაში კარგისკენ ვერაფერს შეცვლის. ამიტომ, ხელისუფლებას კიდევ ერთხელ ვურჩევდი ამ უაზრო თამაშს თავი დაანებონ და ვიფიქროთ ვადამდელ არჩევნებზე”, _განაცხადა რატიანმა.
შეგახსენებთ, რომ საქართველოს პრემიერ-მინისტრმა ირაკლი ღარიბაშვილმა მარტვილსა და საგარეჯოში დაგეგმილ შუალედური არჩევნებისთვის ,,ქართული ოცნების” კანდიდატები დაასახელა. კერძოდ, მარტვილში ,,ქართული ოცნების” კანდიდატი სოსო დანელია იქნება, საგარეჯოში კი თამარ ხიდაშელი.
არასაპარლამენტო ოპოზიციის ნაწილი, ასევე, ,,ნაციონალური მოძრაობა” შუალედურ არჩევნებს ბოიკოტს უცხადებს.