ჟურნალისტი ინგა გრიგოლია ტელეკომპანია „იმედის“ მიერ საზოგადოებრივ-პოლიტიკური თოქშოუების დახურვის თემას „ფეისბუკის“ საკუთარ გვერდზე ეხმიანება და აცხადებს, რომ იმედში პოლიტიკური გადაწყვეტილება მიიღეს.
„...ძალიან მოკლედ მინდა მოგახსენოთ ჩემი პოზიცია გადაცემების დახურვასთან დაკავშირებით. დავიწყებ იმით, რომ ,,იმედი, არის კერძო ტელევიზია და არხს აქვს სრული უფლება მიიღოს გადაწყვეტილება, რომელი გადაცემა სჭირდება და რომელი -არა. ამიტომ, როგორც ჩვენში იტყვიან, გაგებით ვეკიდები მათ გადაწყვეტილებას, რომელიც ვითომ მათ მიიღეს და ვითომ სულაც არ იყო პოლიტიკური“, - წერს გრიგოლია.
ჟურნალისტი აღნიშნავს, რომ სრული უფლება იფიქროს, რომ ეს არის პოლიტიკური გადაწყვეტილება.
„მე მაქვს სრული უფლება ვიფიქრო, რომ ესაა პოლიტიკური გადაწყვეტილება და აი რატომ - არც ერთი კერძო ტელევიზია არ ხურავს გადაცემას, რომელსაც დიდი სარეკლამო შემოსავალი და ძალიან მაღალი ყურებადობა აქვს. მით უფრო, არ ხურავს ორ გადაცემას ერთდროულად, რომელსაც ძალიან მაღალი რეიტინგი აქვს. ეს ტელევიზიის წესია. ამიტომ მე ვფიქრობ,რომ ესაა პოლიტიკური გადაწყვეტილება, რომ მე არ ვყოფილიყავი ეკრანზე არჩევნების წინ“, - აღნიშნავს ინგა გრიგოლია.
გრიგოლიას განცხადებით, მას არ სჯერა, რომ გადაწყვეტილება ტელევიზიის მენეჯმენტმა მიიღო.
„ვერ დავიჯერებ,რომ ეს გადაწყვეტილება თავში ტელევიზიის მენეჯმენტს მოუვიდა, რომლებიც ყოველი გადაცემის მერე აღფრთოვანებულები იყვნენ გადაცემის ყურებადობით. მე ვფიქრობ, რომ ,,იმედმა'' შეასრულა პოლიტიკური დავალება და თან შეასრულა ძალიან ცუდი ფორმით. ერთ დღეს დახურა ორი თოქ-შოუ,რომელიც მე მიმყავდა....“, - აღნიშნავს ჟურნალისტი.
გრიგოლია გაოცებას გამოთქვამს იმის გამო, რომ მისთვის წინასწარ არავის უცნობებია გადაცემების, შესაძლო, დახურვის შესახებ.
„კიდევ ერთი-გასაოცარი ისაა, რომ წინასწარ არც ერთი ფრაზით, არც ერთი შეტყობინებით არავის უთქვამს, რომ გადაცემებს მიხურავდნენ, რამაც გამოიწვია ჩემი გაოგნება. ჩამოვფრინდი ამერიკიდან 28-ში, სადაც დიდი შემართებით ვსაუბრობდი ჩემი გადაცემების უკიდეგანო თავისუფლებაზე და 29-ში ყოველგვარი გაფრთხილების გარეშე დამიხურეს გადაცემები. რა თქმა უნდა, ესაა პოლიტიკური გადაწყვეტილება.... რა თქმა უნდა კარგად მახსოვს ჩემს წინააღმდეგ გაკეთებული განცხადებები მმართველი გუნდის ზოგიერთი წარმომადგენლისგან,და რა თქმა უნდა მე მჯერა, რომ დაავალეს ჩემი დახურვა და ,,იმედმაც'' მიიღო პოლიტიკური გადაწყვეტილება.... ასეთი ამბები ხდებოდა ყველა ხელისუფლების დროს ჩემს თავს და ასე მოხდა დღესაც. ესეც გაივლის. არმატებებს გისურვებთ ყველას. რამდენი მინახავს მოსული და წასული ხელისუფალი, რომელიც მედია პროექტებს ხურავდა... კიდევ რამდენს ვნახავ.“, - წერს ჟურნალისტი.
შეგახსენებთ, რომ ტელეკომპანია „იმედმა“ საზოგადოებრივ-პოლიტიკური თოქშოუები დროებით შეაჩერა. შესაბამისად სექტემბრიდან ეთერში არ გავა ინგა გრიგლია გადაცემები „რეაქცია“ და „იმედის კვირა“.