ავტორიტარიზმისკენ მიდრეკილ ხელისუფალს ყურებადი საზოგადოებრივ-პოლიტიკური თოქშოუები არაფერში სჭირდება. ამის შესახებ „ჯი-ეიჩ-ენს“„სამოქალაქო ალიანსი თავისუფლებისთვის“ ლიდერმა ზურაბ ხარატიშვილმა განუცხადა.
„ავტორიტარიზმისკენ მიდრეკილ ხელისუფალს რეიტინგული ტელევიზიის ეთერში ყურებადი საზოგადოებრივ-პოლიტიკური თოქშოუები არაფერში სჭირდება, მითუმეტეს, რომ ცხელი პოლიტიკური შემოდგომა იწყება - შეტევა რუსთავი 2-ზე, საარჩევნო გარემოს მოთხოვნილი ცვლილებები, ენერგოტარიფების მომატება, ლარის გაქცეული კურსი ინფლაცისთან ტანდემში, ბოიკოტირებული შუალედური არჩევნები, ძველი სახელმძღვანელოები სკოლაში და ა.შ. გასაგებია, რომ არცერთ ამ საკითხზე პოლიტიკურად გაკოტრებულ „საოცნებო ხელისუფლებას“ არგუმენტები აღარ გააჩნია, ამიტომ მიღებულ იქნა ყველაზე „ადვილი“ გადაწყვეტილება ყველა იმ გადაცემის დახურვისა და ტელევიზიების კონტროლქვეს მოქცევის შესახებ, რომლებსაც შეუძლიათ საზოგადოებაში ხელისუფლებისამდი კრიტიკული განწყობა გააღრმავონ“, - განუცხადა „ჯი-ეიჩ-ენს“ ზურაბ ხარატიშვილმა.
მისი თქმით, მიუხედავად იმისა, რომ „იმედი“ პატარკაციშვილების ოჯახის საკუთრებაა, რეალურად მის მართვას ივანიშვილის ხელისუფლება ახორციელებს.
„ამ ქვეყანაში არ მეგულება არსებობდეს ისეთი გულუბრყვილო ზრდასრული ადამიანი, რომელიც ტვ იმედის ეთერში საზოგადოებრივ-პოლიტიკური თოქშოუების დახურვაში ხელისუფლების კვალი ვერ დაინახოს - მიუხედავად იმისა, რომ აღნიშნული ტვ იმედი პატარკაციშვილების ოჯახის საკუთრებაა, საყოველთაოდ ცნობილია, რომ რეალურად მის მართვას ივანიშვილის ხელისუფლება ახორციელებს”, - განაცხადა ხარატიშვილმა.
„სამოქალაქო ალიანსი თავისუფლებისთვის“ ლიდერი აცხადებს, რომ „ქართული ოცნების“ რეჟიმის ავტორიტარულ მენტალიტეტს მედიის თავისუფლების სტანდარტებთან საერთო აღარაფერი აქვს.
„განსაკუთრებით ამაზრზენია იმ პოლიტიკოსებისა და ე.წ. „დამოუკიდებელი ექსპერტების“ სირაქლემის პოზაში ყოფნა, რომლებიც წლების განმავლობაში თავისუფალი მედიის დამცველებად პოზირებენ, ბეწვსაც კი ამჩნევდნენ წინა ხელისუფლებას, მაგრამ ახლა დაბრმავ-ყრუ-მუნჯებულები დირესაც ვერ ხედავენ. ვფიქრობ, რომ არ აქვს მნიშვნელობა მოსწონს თუ არა ვინმეს რუსთავი 2-ს ან გრიგოლია-ხოფერიას გადაცემები - კრიტიკულად მნიშვნელოვანია, რომ ქვეყანაში არსებობდეს რეიტინგული მედია-სივრცე ხელისუფლებისგან განსხვავებული პოლიტიკური და საზოგადოებრივი თვალსაზრისათვის - ამისათვის კი ოპოზიციამ და საზოგადოებამ ერთობლივად უნდა ვიბრძოლოთ”, - განაცხადა ხარატიშვილმა.
მან ასევე აღნიშნა, რომ არაკონტროლირებად მედიაზე შეტევით დღევანდელი ხელისულება ბეჯითად იმეორებს წინამორბედების საბედისწერო შეცდომებს და „კიდევ უფრო იმძიმებს მდგომარეობას“.
„თუ ასე გააგრძელებს, მაღალი ალბათობით ეს ხელისუფლება მალე დასრულდება“, - აღნიშნა ზურაბ ხარატიშვილმა.
