ექპერტი რამაზ საყვარელიძე მიიჩნევს, რომ რუსეთის ინტერესში უნდა იყოს იმ ნდობის გამოყენება, რაც დასავლეთიდან საქართველოს აქვს. მისი შეფასებით, საქართველოში ნატოს სასწავლო ცენტრის გახსნა არ შეიძლება ხიფათის მომტანი იყოს, რადგან ეს უბრალოდ სკოლაა, რომელიც მსოფლიოს მასშტაბით უამრავია გახსნილი. თუმცა,რამაზ საყვარელიძე არ გამორიცხავს, რომ აღნიშნული უმნიშვნელო ფაქტი რუსეთმა საბაბად გამოიყენოს.
”ვერცერთი სასწავლო ცენტრი ვერ იქნება რაიმე საფრთხის შემქმნელი. ესეც სკოლაა ბოლოსდაბოლოს. უამრავი ანალოგიური სასწავლო ცენტრებია გახსნილი. ბევრ ფაქტორზეა დამოკიდებული მოუნდება თუ არა რუსეთს ამ ამბის საბაბად გამოყენება. ეს ფაქტიორებია: როგორი იქნება რუსეთის და დასავლეთის ურთიერთობა - რაც სამწუხაროდ დაძაბულია. მეორეს მხრივ, როგორი იქნება ქართულ-რუსული ურთიერთობების ფარული მხარე.
მე იმ ვერსიის მომხრე ვარ, რომ ქართულმა მხარემ შეძლოს რუსეთთან (თუ უმაღლეს დონეზე არა ქვედა დონეებზე), თუ ღია არა, ფარული ურთიერთობების ქსელის წარმოება. ისეთი ურთიერთობების გამყარება, რომელიც რუსეთს დააინტერესებს დასავლეთთან მიმართებაში.
კერძოდ, წესით რუსეთის ინტერესში უნდა იყოს იმ ნდობის გამოყენება, რაც დასავლეთიდან საქართველოს აქვს, რადგან დღეს თვითონ ძალიან მძიმე ურთიერობა აქვს დასავლეთთან. დიპლომატიური არსენალის სხვადასხვა ინსტრუმენტებით მუშაობა, რომ რაც შეიძლება მეტი მშვიდობიანი ინტერესი ჰქონდეს რუსეთს საქართველოს მიმართ - ეს მეჩვენება გამოსავლად”,-აცხადებს ”ჯი-ეიჩ-ენთან” რამაზ საყვარელიძე.
მისივე თქმით, ისეთი პატარა ქვეყნისთვის როგორიც საქართველოა, მკაფიო ქმედებები სახიფათო იქნება.
”პირდაპირ ნაბიჯებს, ყველა მიმართულებით, დღეს ისეთი უძლიერესი ქვეყანაც კი, როგორიც ამერიკის შეერთებული შტატებია ის არ დგამს. პოლიტიკას არ უყვარს პირდაპირობა. მითუმეტეს არ შეიძლერბა ეს ისეთი პატარა ქვეყნისთვის, როგორიც საქართველოა”,_ განმარტავს რამაზ საყვარელიძე.
რუსეთის საგარეო საქმეთა სამინისტროს წარმომადგენელმა მარია ზახაროვამ განაცხადა, რომ დასავლეთის ქვეყნებსა და თბილისს შორის კავშირების გაღრმავება რეგიონში უსაფრთხოების მხრივ არსებული ვითარების დაძაბვას გამოიწვევს. რუსული მედიის ინფორმაციით, ლავროვის უწყებაში ნატო-საქართვფელოს ერთობლივი ცენტრის გახსნას ალიანსის პროვოკაციული პოლიტიკის გაგრძელებას უწოდებენ.
"ჩვენი აზრით, ეს ნაბიჯი ალიანსის პროვოკაციული პოლიტიკის გაგრძელებაა, რომელიც მიზნად ისახავს მისი გეოპოლიტიკური გავლენის გაფართოებას, რისთვისაც იგი ხშირად იყენებს თავისი პარტნიორი ქვეყნების რესურსებს", - განაცხადა ზახაროვამ. მისივე თქმით, რუსეთი თავის მოვალეობას შეასრულებს და უზრუნველყოფს თავისი მოკავშირეების უსაფრთხოებას.
ეროვნულ სასწავლო ცენტრ კრწანისის ტერიტორიაზე, NATO-საქართველოს ერთობლივი წვრთნისა და შეფასების ცენტრი 27 აგვისტოს გაიხსნა.