ნატო-საქართველოს წვრთნისა და შეფასების ცენტრის გახსნასთან დაკავშირებით, რუსეთის მხრიდან გაკეთებული განცხადება პროვოკაციაა, რასაც შესაძლოა გაგრძელება მოჰყვეს, - ამის შესახებ ”ერთიანი ნაციონალური მოძრაობის” ერთერთმა ლიდერმა ზურაბ ჭიაბერაშვილმა განაცხადა. მისი თქმით, ამის საპირისპიროდ საქართველოს მხრიდან სწორი და მკაფიო პოზიციის დაფიქსირებაა საჭირო.
” რუსეთი, რა თქმა უნდა, პროვოკაციებს გააგრძელებს, მაგრამ სწორედ აქ გვჭირდება, მუდმივად მკაფიოდ ჩვენი პოზიციის დაფიქსირება და არა ისეთი მიკიბ-მოკიბვით ლაპარაკი, როგორც ამას რეგულარულად ღარიბაშვილი და საქართველოს მთავრობის სხვა წევრები აკეთებენ. ამავდროულად აქტიური დიპლომატიაა საჭირო, რომ რუსეთს ფასი დაუჯდეს ნებსმიერი პროვოკაცია, რასაც ის გააკეთებს”, _ აცხადებს ზურაბ ჭიაბერაშვილი.
რუსეთის საგარეო საქმეთა სამინისტროს წარმომადგენელმა მარია ზახაროვამ განაცხადა, რომ დასავლეთის ქვეყნებსა და თბილისს შორის კავშირების გაღრმავება რეგიონში უსაფრთხოების მხრივ არსებული ვითარების დაძაბვას გამოიწვევს. რუსული მედიის ინფორმაციით, ლავროვის უწყებაში ნატო-საქართვფელოს ერთობლივი ცენტრის გახსნას ალიანსის პროვოკაციული პოლიტიკის გაგრძელებას უწოდებენ.
"ჩვენი აზრით, ეს ნაბიჯი ალიანსის პროვოკაციული პოლიტიკის გაგრძელებაა, რომელიც მიზნად ისახავს მისი გეოპოლიტიკური გავლენის გაფართოებას, რისთვისაც იგი ხშირად იყენებს თავისი პარტნიორი ქვეყნების რესურსებს", - განაცხადა ზახაროვამ. მისივე თქმით, რუსეთი თავის მოვალეობას შეასრულებს და უზრუნველყოფს თავისი მოკავშირეების უსაფრთხოებას.