უშიშროების საბჭოს მდივანი ირინე იმერლიშვილი აცხადებს, რომ საქართველოს უმაღლესი მთავარსარდალი არის იქ, სადაც არის ქართული ჯარი, - ასეთი პასუხი იმერლიშვილმა ჟურნალისტებს თავდაცვის სამინისტროს პრესრელიზში და თავდაპირველ პროგრამაში პრეზიდენტის სიტყვით გამოსვლის გაუთვალისწინებლობაზე გასცა.
"ტექნიკურ დეტალებზე ნამდვილად ვერ გაგცემთ პასუხს, ვინაიდან ეს არ არის პრეზიდენტის და მით უფრო უშიშროების საბჭოს ორგანიზებული ღონისძიება, თუმცა, სადაც არის ქართული ჯარი, იქ არის საქართველოს უმაღლესი მთავარსარდალი", - განაცხადა იმერლიშვილმა.
თავდაცვის სამინისტროს პრესრელიზის თანახმად, ღონისძიებაზე მხოლოდ თავდაცვის მინისტრის, პრემიერისა და ნატო-ს გენერალური მდივნის განცხადებები იყო გათვალისწინებული. თუმცა, თავდაცვის მინისტრის ინფორმაციით, პრეზიდენტის სიტყვა პროგრამით გათვალისწინებული იყო.
შეგახსენებთ, ნატო-საქართველოს ერთობლივი წვრთნისა და შეფასების ცენტრი პრემიერ-მინისტრმა ირაკლი ღარიბაშვილმა და ნატოს გენერალურმა მდივანმა იენს სტოლტენბერგმა გახსნეს. ღონისძიებაზე სიტყვით თავდაცვის მინისტრი თინა ხიდაშელი, პრემიერ-მინისტრი ირაკლი ღარიბაშვილი, ნატო-ს გენერალური მდივანი იენს სტოლტენბერგი და საქართველოს პრეზიდენტი, შეიარაღებული ძალების უმაღლესი მთავარსარდალი გიორგი მარგველაშვილი გამოვიდნენ.
