შერიგებისა და სამოქალაქო თანასწორობის საკითხებში სახელმწიფო მინისტრ პაატა ზაქარეიშვილის განცხადებით, დღევანდელმა ხელისუფლებამ მოახერხა, რომ გატაცებულ ადამიანებს 2-3 დღეში ათავისუფლებენ. სოფელ ბერშუეთიდან დღეს საოკუპაციო ძალების მიერ ორი მოქალაქის გატაცებასთან დაკავშირებიტ მინისტრმა განაცხადა, რომ მათ სულ მალე გაათავისუფლებენ.
"ამ კუთხით ცვლილება მოხდა. როცა თვეობით ჰყავდათ დაკავებულები ადამიანები წინა ხელისუფლების დროს, ჩვენ მოვახერხეთ ის, რომ 2-3 დღეში ათავისუფლებენ მათ. ამ შემთხვევაშიც შს სამინისტრო მუშაობს და მე დარწმუნებული ვარ, რომ სულ მალე გაათავისუფლებენ მათ", - განაცხადა პაატა ზაქარეიშვილმა.
გორის რაიონი ს სოფელ ბერშუეთთან შეიარაღებულმა პირებმა ორი ადგილობრივი, 75 წლის მურაზ ჯავახიშვილი და 41 წლის ივანე სეხნიაშვილი დააკავეს.
