რაც მეტი იქნება ნატოს ყოფნა საქართველოს ტერიტორიაზე, მით უფრო ახლოს მივალთ ჩვენ საბოლოო მიზანთან - სრულ ინტეგრაციასთან. რუსეთს კი უნდა ესმოდეს, რომ საქართველოში მომდევნო სამხედრო მოქმედება არ იქნება მისთვის "უფასო" ამის შესახებ „ჯი-ეიჩ-ენს“ საქართველოს რეფორმების ასოციაციის თავმჯდომარემ სერგი კაპანაძემ საქართველოში ნატოს სასწავლო ცენტრის გახსნის მნიშვნელობაზე საუბრისას განუცხადა.
„ეს ძალიან პოზიტიური ნაბიჯია, რადგან ნატო საქართველოში ხსნის სერიოზულ ინფრასტრუქტურულ პროექტს, რომელსაც მოჰყვება ნატოს სამხედროების საქართველოს ტეირტორიაზე განლაგება. რა თქმა უნდა, რაც მეტი იქნება ნატოს ყოფნა საქართველოს ტერიტორიაზე, მით უფრო ახლოს მივალთ ჩვენ საბოლოო მიზანთან - სრულ ინტეგრაციასთან», - განუცხადა „ჯი-ეიჩ-ენს“ კაპანაძემ.
რაც შეეხება რუსეთის საპასუხო რეაქციებს, კაპანაძე აცხადებს, რომ რუსეთის მხრიდან ამ ეტაპზე ყველაფერი მოსალოდნელია.
„რუსეთის მხრიდან ამ ეტაპზე ყველაფერი მოსალოდნელია, განსაკუთრებით მის შიგნით მიმდინარ ეპროცესების გათვალისწინებით და იმ პრობლემების გათვალისწინებით რაც მას შეექმნა სამეზობლოში უკრაინაში შეჭრის შემდეგ. რუსეთმა ნებისმიერი რამე შეილება გამოოიყენოს სამხედრო მოემქედებების გასაახლებლად“, - აცხადებს კაპანაძე.
რეფორმების ასოციაციის თავმჯდომარე მიიჩნევს, რომ რუსეთის გასანაიტრალებლად საქართველოს ხელისუფლებამ აქტიურად უნდა იმუშაოს საერთაშორისო საზოგადოებასთან და გააძლიეროს დიპლომატიური ძალისხმევა.
„ჩვენი მხრიდან ერთადერთი სწორი რეაქცია ამაზე უნდა იყოს მაქსიმალურად ყველას გაფრთხილება, თუ რაზეა რუსეთი წამსვლელი და მეგობრების დარაზმვა, რომ გართულების შემთხვევაში გვქონდეს დიდი მხარდაჭერა. რუსეთს ასევე უნდა ესმოდეს, რომ საქართველოში მომდევნო სამხედრო მოქმედება არ იქნება მისთვის "უფასო" და მას დაუჯდება როგორც ადამიანურ რესურსად, ისე სერიოზულ დიპლომატიურ მარცხად“, - განაცხადა კაპანაძემ.
შეგახსენებთ, ნატო-საქართველოს ერთობლივი წვრთნისა და შეფასების ცენტრის შექმნა ნატო-ს უელსის სამიტზე გადაწყდა. 27 აგვისტოს, ცენტრის ინაუგურაციას კრწანისის სასწავლო ცენტრის ტერიტორიაზე, ნატოს გენერალური მდივანი იენს სტოლტენბერგი დაესწრება.
