აშშ-ის ელჩის მოვალეობის შემსრულებელი საქართველოში მისი მისამართით გაკეთებულ კრიტიკულ განცხადებებს პასუხობს და აცხადებს, რომ პოზიცია, რომელიც ,,რუსთავი 2” - თან დაკავშირებით დააფიქსირა აშშ-ის ხელისუფლების პოზიციაცაა.
როგორც ნიკოლას ბერლინერმა "რუსთავი 2"-ს განუცხადა, კარგად არის ცნობილი შეერთებული შტატების პოზიცია მედიის თავისუფლებასთან დაკავშირებით.
"განცხადება, რომელიც გასულ კვირას ტელეკომპანია "რუსთავი 2"-თან დაკავშირებით გავაკეთე, ვფიქრობ მოულოდნელი არავისთვის უნდა ყოფილიყო. კარგად არის ცნობილი შეერთებული შტატების პოზიცია მედიის თავისუფლებასთან დაკავშირებით. ამ შემთხვევაში ჩვენ უბრალოდ მოვუწოდეთ სიფრთხილისკენ და იმედი გამოვთქვით, რომ ნებისმიერი სამართლებრივი პროცესი უმაღლესი სტანდარტების შესაბამისად წარიმართება. ჩემს მიერ გაკეთებული განცხადება შეგიძლიათ მიიღოთ, როგორც შეერთებული შტატების ხელისუფლებისა და საელჩოს პოზიცია", -განაცხადა ბერლინერმა.
შეგახსენებთ, რამდენიმე დღის წინ მან ტელეკომპანია "რუსთავი 2"-თან დაკავშირებით განაცხადა, რომ "წუხილს იწვევს მოვლენების ისეთი განვითარება, რომელიც მედიის თავისუფლების საფრთხის ქვეშ დაყენების ან მედიაპლურალიზმის დარღვევის შთაბეჭდილებას ტოვებს".
ნიკოლას ბერლინერის ამ განცხადებას ღია წერილით უპასუხა მწერალმა დავით მაღრაძემ.
,,გულწრფელად მინდა რომ თქვენი, ვფიქრობ უსაფუძვლო შეშფოთება დავაცხრო და გითხრათ რომ იყავით მშვიდად, საქართველოში სიტყვის თავისუფლებას საფრთხე აღარ ემუქრება, რადგან ურეიტინგო, პოლიტიკურ-ზნეობრივად გაკოტრებული, ხალხის უნდობლობით დაღდასმული, დაშლილი, დანაწევრებული "ნაციონალური მოძრაობა" ხელისუფლებაში ვერასოდეს მობრუნდება. ამას საქართველოს მოსახლეობა არ დაუშვებს”..- ნათქვამია დავით მაღრაძის ღია წერილში.
