თბილისის საკრებულოს წევრი, საქართველოს საავტომობილო ფედერაციის პრეზიდენტი შალვა ოგბაიძე ქვეყანაში საგზაო შემთხვევების გაზრდის ფაქტს საპატრულო პოლიციის მხრიდან კონტროლის შესუსტებასთან ერთად, შინაგანი კულტურის ნაკლებობას უკავშირებს.
გადაჭარბებული სიჩქარით მოძრაობაზე კონტროლის შესუსტებას განსაკუთრებით, ტურისტულ ზონებში ბიზნესის წარმოამდგენლები უჩივიან. მათი განმარტებით, პატრულირება არ ხდება სათანადო დონეზე, რასაც წესების დარღვევა და საგზაო შემთხვევების ზრდა მოჰყვება.
”პატრული ვერ არეგულირებს მოძრაობას. მანქანები დადიან 120 კილომეტრი საათი სიჩქარით. ყოველ სამ -ოთხ დღეში თითო ბავშვი ავარიაში ყვება. სიჩქარის გადაჭარბების შემთხვევები მუდამ არის, ზაფხულში ეს განსაკუთრებით სახიფათოა”, _ აცხადებს გრიგოლეთში მდებარე სასტუმრო ”ვილა რეტას” მფლობელი რეზო ხონელიძე.
შალვა ოგბაიძე ”ჯი-ეიჩ-ენთან” განმარტავს, რომ კონტროლი და დარღვევები გახლავთ საგზაო მოძრაობის უსაფრთხოების სფეროს ერთ- ერთი და არა ერთადერთი საკითხი.
,,თავის მოტყუება იქნება, თუ დავიჯერებთ, რომ რაც უფრო მეტი საპატრულო ეკიპაჟი გვეყოლება, ნაკლები იქნება სიჩქარის გადაჭარბების შემთხვევები. აქ საქმე გვაქვს იმ განათლების სისტემის მოშლასთან, რომელსაც ავტოსკოლა ჰქვია, სადაც ყალიბდება მაღალი უსაფრთხოების კულტურის ადამიანი. ადამიანს მხოლოდ დაჯარიმების შიში არ უნდა ჰქონდეს, შინაგანი კულტურაც უნდა გააჩნდეს. მთავარია კულტურა და კონტროლი. მე მიმაჩნია, რომ კონტროლი რამდენადმე შესუსტებულია”, _ აცხადებს შალვა ოგბაიძე.
იგი ახლო მომავალში მდგომარეობის გამოსწორებას ახალი საპატრულო პოლიციის ხელმძღვანელის ჩარევით ელოდება.
”ღრმად ვარ დარწმუნებული, რომ იგი არასამთავრობოებთან ინტერაქტივში მოვა. დამერწმუნეთ უახლოეს მომავალში ჩვენ შეგვიძლია მკვეთრად შევამციროთ ის საშიში რისკები, შედეგები, რაც გადაჭარბებულ სიჩქარეს მოჰყვება”, _ აცხადებს შალვა ოგბაიძე.
