ე.წ. კორტების სპეცოპერაციაზე ბრალდებული რიგითი სპეცრაზმელები პატიმრობიდან გაატავისუფლეს. იასონ მილაძეს, ზურაბ ჯოხაძეს, ალექსანდრე ციმაკურიძეს, სოსო ჩაკვეტაიას, დავით ალელიშვილს, გიორგი გულბიანსა და ალექსანდრე სანიკიძეს თავდებში სპეცდანიშნულების რაზმის მოქმედი წევრები დაუდგნენ.
ადვოკატებმა ბრალდებულების გათავისუფლების შესახებ შუამდგომლობა დღევანდელ სასამართლო პროცესზე დააყენეს. შუამდგომლობას პროკურატურაც დაეთანხმა.
ე.წ. კორტების სპეცოპერაციის საქმე ორ ნაწილად არის გაყოფილი. ცალკე განიხილება ხელმძღვანელი პირების - ირაკლი ფირცხალავას, კახა ნაკანის, გიორგი ცააძის, ლევან ბეროძისა და გრიგოლ კვინიკაძის საქმე, ხოლო რიგითი სპეცრაზმელების საქმე ცალკე განიხილება.
ე.წ. კორტების სპეცოპერაციის საქმეზე რიგითი სპეცრაზმელების საქმე ცალკე წარმოებად 11 ივნისს გამოიყო. თავდაპირველად ბრალი წარედგინა 12 პირს, საიდანაც 11 დააკავეს. თუმცა, პროკურატურის შუამდგომლობის საფუძველზე, თბილისის საქალაქო სასამართლომ ხელმძღვანელი პირების საქმე ცალკე წარმოებად გამოყო, რიგითი სპეცრაზმელების კი - ერთ წარმოებად. ამასთან, 8 ივლისის სხდომაზე, სამი რიგითი სპეცრაზმელი დაკითხეს. პროცესი დახურული იყო. პროკურორის და ადვოკატის ინფორმაციით, ბრალდებულებმა "მამხილებელი ჩვენებები მისცეს".
