,,ქართულ ოცნებაში” მოქალაქეების სოციალურად დაუცველთა ბაზის მიღმა დარჩენას, თავის დროზე ,,ნაციონალების” მიერ სიების ხელოვნურად გაზრდით ხსნიან. პარლამენტის ჯანდაცვისა და სოციალურ საკითხთა კომიტეტის თავმჯდომარე დიმიტრი ხუნდაძე ზურაბ ჭიაბერაშვილის ბრალდებებს პასუხობს და აცხადებს, რომ სოციალურად დაუცველთა საკითხით ,,ნაცმოძრაობამ ” არაერთხელ მოაწყო წინასაარჩევნო ტრიუკი.
დეპუტატი, გავრცელებულ განცხადებაში ასევე აღნიშნავს, რომ ,,ნაციონალები” ცდილობენ მოახლოებული 8 აგვისტოს თემა გადაფარონ.
„ახლოვდება საპარლამენტო არჩევნები და ნაციონალური მოძრაობა ცდილობს მეტი ნეგატივი შეიტანოს მოსახლეობაში ნებისმიერ თემასთან დაკავშირებით, მათ შორის სოციალურად დაუცველთა საკითხით მათ არაერთხელ მოაწყვეს წინასაარჩევნო ტრიუკი. ამასთან, მოახლოებულია 8 აგვისტო და სხვადასხვა თემებით ცდილობენ მათთვის სამარცხვინო ლაქის ჩამორეცხვას და ყველასათვის ტკივილიანი დღის გადაფარვას.
მსურს საზოგადოებას მივაწოდო მნიშვნელოვანი ინფორმაცია: მას შემდეგ, რაც 2011 წელს ბიძინა ივანიშვილმა გააკეთა განცხადება პოლიტიკაში შემოსვლასთან დაკავშირებით, სოციალურად დაუცველთა რაოდენობა მყისიერად გაიზარდა და 2012 წლის იანვრამდე გაგრძელდა. ბუნებრივია, სოციალურად შეჭირვებულთა რადენობა ერთ დღეში არ გაიზრდებოდა, მათი რაოდენობის გაზრდა მოხდა მხოლოდ პოლიტიკური მიზნებისთვის – მოსახლეობისგან რაც შეიძლება მეტი ხმა მიეღოთ და მეტი მოქალაქე ყოლოდათ შანტაჟის ქვეშ. სტატუსის მინიჭება ხდებოდა უსამართლოდ, იღებდნენ ისინი, ვისაც არ ეკუთვნოდათ. არ იღებდნენ ისინი, ვისაც მართლა ეკუთვნოდათ, მაგრამ არ ყვნენ მათი ამომრჩევლები.
2012 წლის იანვრამდე სოციალურად დაუცველთა რაოდენობა კატასტროფულად იზრდებოდა. ამას რამდენიმე მიზეზი ჰქონდა: საპარლამენტო არჩევნებამდე ამომრჩეველთა ხმების მოსყიდვა; ჩვენი ხელისუფლებაში მოსვლის შემდეგ კი რაოდენობის გაზრდით ნაცმოძრაობა ცდილობდა ბიუჯეტიდან მეტი თანხა გასულიყო და რაც მთავარია, გადამოწმების შემდეგ მეტი მოქალაქე დარჩენილიყო უკმაყოფილო ხელისუფლებაზე. ეს პოლიტიკა გრძელდება დღესაც, რომლის გამხმოვანებელიც გახლავთ ზურაბ ჭიაბერაშვილი. იგი მუდმივად გაიძახის, რომ ბენეფიციართა რაოდენობის შემცირებით მოხდა მათთვის გასაცემელი თანხის გაზრდა. არაერთხელ განმიცხადებია, რომ ეს მტკნარი სიცრუეა და ამის დამადასტურებელი ფაქტებიც ბევრჯერ გამოვაქვეყნე. ფაქტი ერთია, ყველაზე გაჭირვებული ხალხის თემებით ნაცმოძრაობა პოლიტიკურ სპეკულაციას ეწევა.
მსურს მივმართო იმ მოქალაქეებს, რომლებიც ამ სტატუსის მატარებლები ან მის მოლოდინში არიან: ჩვენ უსამართლო კრიტერიუმები სმართლიანი კრიტერიუმებით შევცვალეთ, გავაორმაგეთ დახმარება, დავამატეთ ბავშვზე გასაცემელი და რაც მთავარია, მეტად ვეხმარებით იმას, ვისაც მეტად ესაჭიოროება დახმარება. რაც შეეხება ხარვეზებს, მასშტაბურ პროექტს ყოვეთვის ახლავს ხარვეზები. მთავარია, ჩვენ ეს ხარვეზები დროზე აღმოვფხარით. გარწმუნებთ, თითოეული განცხადება იქნება ყურადღებით შესწავლილი და ყველა გადაწყვეტილება იქნება ობიექტური.
მიუხედავად იმისა რომ ახლოვდება არჩევნები, ნაცმოძრაობისგან განსხვავებით, ჩვენ არ ვგეგმავთ გაჭირვებული ხალხის ხმების გამოყენებას, ეს არ არის ჩვენი ხელწერა. თუნდაც მწვავე პროცესების იუხედავად, მაქსიმალრად ვცდილობთ ყველა პროექტი განხორციელდეს ხალხისთვის და არა ჩვენი პოლიტიკური მიზნებისთვის“,– განაცხადა დიმიტრი ხუნდაძემ.
ქართული ოცნების “ ხელისუფლებაში ყოფნის პერიოდში საარსებო შემწეობის გარეშე 5000-ზე მეტი ოჯახი დარჩა, რომელშიც 3 და მეტი ბავშვია, - ამის შესახებ ,,ნაციონალური მორაობის” წევრი ზურაბ ჭიაბერაშვილი აცხადებს. მისი თქმით, სულ ამ ხნის განმავლობაში 27,000 ბავშვი დარჩა საარსებო შემწეობის გარეშე, აქედან 9,000 მხოლოდ მას შემდეგ, რაც დავით სერგეენკომ 2014 წლის დეკემბერში სოციალურად დაუცველი მოსახლეობის აღწერის ახალი მეთოდოლოგიის შესახებ გამოაცხადა.
