სექტემბრის თვეში თბილისში საერთაშორისო სავალუტო ფონდის მისია ჩამოვა, რომელთან ერთადაც მთავრობა სებ-ის შესახებ კანონში ცვლილებების საკითხს გაივლის, - ამის შესახებ ფინანსთა მინისტრმა ნოდარ ხადურმა მთავრობის დღევანდელი სხდომის დასრულების შემდეგ განაცხადა.
შესაბამისად, მისივე თქმით, პრეზიდენტის მიერ ეროვნული ბანკის კანონპროექტზე ვეტოს დადების საჭიროებას ვერ ხედავს.
"მოგეხსენებათ, გუშინ პრემიერმინისტრი შეხვდა საერთაშორისო სავალუტო ფონდის მუდმივ წარმომადგენელს საქართველოში. დღეს ვიმსჯელეთ მთავრობის სხდომაზე ამასთან დაკავშირებით, რომ შენიშვნების ძალიან დიდი ნაწილი იქნება გათვალისწინებული. სექტემბრის თვეში თბილისში ჩამოვა საერთაშორისო სავალუტო ფონდის მისია, რომელთან ერთადაც ამას გავივლით და შევთავაზებთ კონკრეტულ გეგმას იმასთან დაკავშირებით, თუ როგორ მოხდება ამის ასახვა მოქმედ კანონში. ასე რომ, ვერ ვხედავ ვერანაირ საჭიროებას იმისა, რომ დაიდოს ვეტო ან სხვა რაიმე მექანიზმები", - თქვა ხადურმა.
