ნატოში არ არსებობს ქვეყანა, რომელიც წინააღმდეგია საქართველოსთვის MAP-ის მიცემის, - ამის შესახებ, ჩეხეთის რესპუბლიკაში სამუშაო ვიზიტით მყოფმა საქართველოს თავდაცვის მინისტრმა რადიო თავისუფლების პროგრამა „დაბრკოლების ზოლთან“ ინტერვიუში განაცხადა. თინა ხიდაშელი აცხადებს ასევე, რომ ევროპაში, ვარშავის სამიტამდე 11 თვით ადრე, უჭირთ პირდაპირი პასუხის მოცემა.
,,ნატოში არ არსებობს დღეს ქვეყანა, რომელიც სკეპტიკურად უყურებს საქართველოსთვის MAP-ის მიცემას, ან წინააღმდეგია MAP-ის მიცემის. არ არსებობს ქვეყანა, რომელიც ამბობს, რომ ჩვენ არ გვეკუთვნის MAP-ი. ისინი ითვლიან, წინ 11 თვეა და 11 თვით ადრე, დღევანდელ ევროპაში უჭირთ პირდაპირი პასუხის მოცემა", - აღნიშნა მინისტრმა.
იგი მიიჩნევს, რომ ამჟამად უკრაინაში მიმდინარე პროცესი საქართველოსთვის შესაძლებლობის ფანჯარაც კი არის, რადგან რუსეთი ვერ გახსნის ფრონტს კიდევ სხვა მიმართულებით.
ჟურნალისტის კითხვაზე - ასეთ შემთხვევაში ოპონენტები იკითხავენ, თუ რუსეთი არ არის მზად ფრონტის გასახსნელად, რატომ საქართველო არ აკეთებს ამას,
ხიდაშელი პასუხობს, რომ ის თავს იკავებს ბევრი ისეთი რამის თქმისგან, რასაც ოპონენტები იმსახურებენ.
,,ჩვენ არ გავხსნით არანაირ ფრონტის ხაზს და არ დავიწყებთ ომს. ასეთია დღევანდელი ქართული ხელისუფლება. ვიღაცას ეს მოსწონს, ვიღაცას არ მოსწონს, ვიღაცას სისხლი უყივის. ეს სისხლის ყივილი ვნახეთ მრავალგზის, შედეგებიც სახეზე გვაქვს, ამიტომ 2016 წლის შემოდგომამდე ასეთია ქართული ხელისუფლება. 2016 წელს საქართველოს მოსახლეობას ექნება შესაძლებლობა, სამართლიანი არჩევნების გზით, განსაზღვროს პრაგმატული პოლიტიკის გამტარებელი ხელისუფლება ურჩევნია თუ ის, ვისაც სისხლი უყივის”, - განაცხადა ხიდაშელმა და დასძინა, რომ როგორი ჯარიც არ უნდა მოამზადოს საქართველომ, თუ იქნება მარტო რუსები უბრალოდ რაოდენობით აჯობებენ, თუმცა, მინისტრის თქმით, საქართველო მარტო არ არის და ამის დასტურია საფრანგეთთან გაფორმებული ხელშეკრულებები და პრაღაში მიმდინარე ვიზიტისას წარმოებული მოლაპარაკებები.
