აგრარულ საკითხთა კომიტეტის თავმჯდომარის პირველ მოადგილედ გელა გელაშვილი აირჩიეს. ეს თანამდებობა მას შემდეგ გახდა ვაკანტური, რაც ყოფილი პირველი მოადგილე გელა სამხარაული პარლამენტმა აგრარულ საკითხთა კომიტეტის თავმჯდომარედ აირჩია.
კომიტეტის დღევანდელ სხდომაზე კომიტეტის თავმჯდომარის პირველი მოადგილის თანამდებობაზე წარდგენილი იყო პარლამენტის წევრის, სიღნარის მაჟორიტარი დეპუტატის გელა გელაშვილის კანდიდატურა, რომელიც კომიტეტის წევრებმა ერთხმად აირჩიეს.
დღესვე, კომიტეტის სხდომაზე განიხილეს საქართველოს პრეზიდენტის მიერ რატიფიკაციისთვის წარმოდგენილი კონვენცია „ევროპის და ხმელთაშუა ზღვის მცენარეთა დაცვის ორგანიზაციის შექმნის შესახებ“. საკითხი სოფლის მეურნეობის მინისტრის პირველმა მოადგილემ ნოდარ კერესელიძემ გამოიტანა, რომლის განცხადებით, ევროპისა და ხმელთაშუა ზღვის მცენარეთა დაცვის ორგანიზაციაში (EPPO) გაწევრიანება წარმოადგენს საქართველოსათვის მნიშვნელოვან საკითხს.
EPPO ახორციელებს კონსულტაციებსა და დახმარებას მონაწილე ქვეყნებისადმი იმ ადმინისტრაციული და საკანონმდებლო აქტების გატარებაში, რომელიც აუცილებელია ქვეყნებს შორის ვაჭრობის დროს საკარანტინო მავნე ორგანიზმების გავრცელების თავიდან ასაცილებლად ან მკვეთრი შეზღუდვისათვის. დღეისათვის ამ ორგანიზაციაში გაწევრებულია 50 ქვეყანა, მათ შორის აზიიდან.
როგორც მომხსენებელმა აღნიშნა, ორგანიზაციაში გაწევრიანების შედეგად ქვეყანა მიიღებს EPPO-ს მიერ შექმნილ და მხარდაჭერილ მონაცემთა ბაზასა და სრულ თანამედროვე ფიტოსანიტარულ ინფორმაციას. უნდა ითქვას, რომ საერთაშორისო ვაჭრობაში EPPO-ს წევრი ქვეყნიდან ექსპორტირებულ მცენარეებსა და მცენარეული პროდუქციის მიმართ დამოკიდებულება იმპორტიორი ქვეყნების მხრიდან, გამოირჩევა გაზრდილი ნდობით. ამასთანავე, ქვეყნის ექსპერტებს შესაძლებლობა ექნებათ მონაწილეობა მიიღონ საერთაშორისო შეკრებებსა და კონფერენციებში და ამგვარი მონაწილოებით ზეგავლენა მოახდინონ შესამუშავებელ საერთაშორისო სტანდარტებზე (რათა გათვალისწინებულ იქნეს ქვეყნის ინტერესები). ქვეყანა ასევე მიიღებს შესაძლებლობას, სხვა ქვეყნებთან ფიტოსანიტარიული დავები EPPO-ს ტრიბუნის მეშვეობით დაარეგულიროს და სხვა.
მისივე თქმით, EPPO-ში გაწევრიანებით, საქართველო შეძლებს: თავისი ტერიტორიის, სასოფლო-სამეურნეო კულტურების, ტყის ჯიშების ფიტოსანიტარიული დაცვის დონის ოპტიმიზაციის მიღწევას; ფიტოსანიტარიულ-საკარანტინო ღონისძიებების კოორდინირებას და ჰარმონიზებას EPPO-ს წევრი ქვეყნების მიერ განსახორციელებელი ღონისძიებების მიმართ, რასაც დიდი მნიშვნელობა აქვს საერთაშორისო ვაჭრობის დროს, ფიტოსანიტარული თვალსაზრისით საქართველოს, როგორც კეთილსაიმედო - სატრანზიტო ქვეყნის იმიჯის დამკვიდრებისათვის.
კომიტეტის წევრებმა ერთხმად დაუჭირეს მხარი „ევროპის და ხმელთაშუა ზღვის მცენარეთა დაცვის ორგანიზაციის შექმნის შესახებ“ კონვენციის პარლამენტის პლენარულ სხდომაზე გატანას.
