„პანორამა თბილისის“ განხორციელება ქვეყანას ეკონომიკურ და სოციალურ განვითარებაში დაეხმარება, - ამის შესახებ დედაქალაქის მერმა დღეს ჟურნალისტებთან განაცხადა. დავით ნარმანიას თქმით, აღნიშნული პროექტის ყველა ნიუანსს ძალიან კარგად იცნობს.
,,ამ პროექტს კარგად ვიცნობ, მის თითოეულ ნიუანსს. ეს არის საინტერესო პროექტი, როგორც ეკონომიკური განვითარებისთვის, ასევე სოციალური თვალსაზრისით. საკმაოდ ბევრი ადამიანი საქმდება, როგორც მშენებლობის პროცესში, ასევე ექსპლუატაციის პროცესში და ნახევარ მილიარდამდე ინვესტიცია სერიოზულად აისახება, როგორც დედაქალაქის, ასევე ქვეყნის ეკონომიკაზე“, - განაცხადა დავით ნარმანიამ.
რაც შეეხება პროექტის საწინააღმდეგოდ საკრებულოსთან გამართულ აქციებს, მერი აცხადებს, რომ
უცენზურო სიტყვებით გამოსვლის უფლება არავის აქვს.
„ყველას აქვს აზრის გამოთქმის უფლება, მაგრამ აზრის და გამოხატვის თავისუფლებასაც აქვს გარკვეული საზღვრები. არავის აქვს უფლება, რომ უცენზურო სიტყვებით გამოვიდეს და ვინმეს მიმართოს. ამიტომ იყო რეაგირება სამართალდამცავი ორგანოების მხრიდან“, - აღნიშნა მერმა.
შეგახსენებთ, გუშინ საკრებულოსთან „პანორამა თბილისის“ პროექტის მოწინააღმდეგეთა აქციაზე, პოლიციამ წვრილმანი ხულიგნობის ბრალდებით რამდენიმე პირი დააკავა.
