იუსტიციის სამინისტრო ზეიმობს, რომ გვეღირსა ბავშვთა საქმეებში სპეციალიზებული მოსამართლეები, პროკურორები და პოლიციელები, სოციალური მუშაკები და ადვოკატები, რომლებიც სისხლის სამართლის პროცესში ბავშვთა უფლებებს დაიცავენ, - ამის შესახებ იუსტიციის მინისტრმა თეა წულუკიანმა „არასრულწლოვანთა მართლმსაჯულების კოდექსის“ პრეზენტაციამდე განაცხადა.
„იუსტიციის სამინისტრო ამ კოდექსითაც აჩვენებს იმას, რომ დავუსვით წერტილი იმ კულტურას, რომელიც ერთხელ შეცდომაში შეყვანილი ბავშვის ძალიან ბევრი წლით ციხეში გამოკეტვით გამოიხატებოდა. ეს კულტურა ამ კოდექსით დასრულდა და დღეს ამას ვზეიმობთ“, - დასძინა წულუკიანმა.
„არასრულწლოვანთა მართლმსაჯულების კოდექსის“ პრეზენტაცია დღეს მოსწავლე-ახალგაზრდობის სასახლეში გაიმართა. პრეზენტაციას იუსტიციის მინისტრი და უზენაესი სამამართლოს თავმჯდომარე ნინო გვენეტაძე ესწრებოდნენ.
კოდექსის ამოქმედება დაგეგმილია 2016 წლის 1 იანვრიდან. ამასთან, იმ მუხლების ძალაში შესვლა, რომელთა იმპლემენტაციისთვის დამატებითი ღონისძიებების გატარებაა საჭირო, იგეგმება 2016 წლის განმავლობაში და 2017 წლის 1 იანვრიდან.
საქართველოს პარლამენტმა „არასრულწლოვანთა მართლმსაჯულების კოდექსი“ მესამე მოსმენით 12 ივნისს მიიღო. კოდექსი კანონთან კონფლიქტში მყოფი ბავშვებისთვის ნოვაციებს ამკვიდრებს.
პროექტი ხორციელდება ევროკავშირისა და გაერო-ს ბავშვთა ფონდის ფინანსური მხარდაჭერით.
