ე.წ. კორტების სპეცოპერაციის საქმეზე ბრალდებული, პოლიციის ყოფილი მაღალჩინოსნის ირაკლი ფირცხალავას ადვოკატის დავით ხაჟალიას განცხადებით, გიორგი ცააძის მიერ, დღეს დაკითხულუი მოწმისთვის ნათქვამი სიტყვები მუქარას არ წარმოადგენდა.
„ცააძის განცხადება არანაირი მუქარა არ იყო, იმიტომ, რომ გოგატიშვილს როცა დაუსვეს კითხვა - ამდენი ხანი თქვენ ეს ყველაფერი თუ იცოდით, რატომ არ განაცხადეთო, გოგატიშვილმა უთხრა, თქვენი მეშინოდაო. ცააძემ მას მიმართა - ახლა არ გეშინია, ჩვენი მეგობრები ხომ ყველა გარეთ არიანო. ეს ლოგიკურიც იყო“, - განაცხადა ადვოკატმა.
თბილისის საქალაქო სასამართლოში ბრალდების მოწმე კობა გოგატიშვილმა 2006 წლის 2 მაისს ჩატარებული ე.წ. კორტების სპეცოპერაცია გაიხსენა, რომელსაც იგი შეესწრო. გოგატიშვილის თქმით, მანქანას, რომელიც კორტების ტერიტორიაზე მოძრაობდა, სპეცრაზმელები ესროდნენ. მანქანიდან კი სროლა არ განხორციელებულა. მისივე თქმით, მანქანაში მჯდომებზე საკონტროლო გასროლა ცააძემ განახორციელა.
