,,ნაცმოძრაობის” წევრი გიორგი კანდელაკის განცხადებით, ყოფილი პრემიერის ბიძინა ივანიშვილის ერთ-ერთი მთავარი წინასაარჩევნო დაპირება რუსეთთან ურთიერთობების „დალაგება“ და გაუმჯობესება ცრუ აღმოჩნდა და ურთიერთობა პირიქით მნიშვნელოვნად გაუარესებულია.
მისივე თქმით, მთავრობის შიგნით არ არსებობს არც კოორდინაცია და არც მინიმალური კომპეტენცია,რომ რუსეთის საოკუპაციო ძალების გამოწვევებს გაუმკლავდნენ.
,,შემაშფოთებელია მინისტრ ზაქარეიშვილის აბსურდული განცხადება რომ რუსეთის ნაბიჯი „ოკუპაციის კანონის ფარგლებში ჯდება,“ თავდაცვის მინისტრის განცხადება რომ „ამაში განსაკუთრებული არაფერია,“ ვიცე-პრემიერ კალაძის მოწოდება გაუგებარი ახალი ფორმატის შექმნის აუცილებლობასთან დაკავშირებით (მაშინ როცა საგარეო საქმეთა სამინისტრომ უარყო ამ მიმართულებით რაიმე დისკუსიის არსებობა). მსგავსი განცხადებების სერია დააგვირგვინა პრემიერ-მინისტრის გამაოგნებელმა მოწოდებამ რომ „რუსები ყურადღებას მიაქცევენ“ და თავად აღკვეთავენ საკუთარ ქმედებებს. ამგვარი რეაქცია კიდევ ერთხელ გვაჩვენებს არა მარტო იმას რომ მთავრობის შიგნით არ არსებობს არც კოორდინაცია და არც მინიმალური კომპეტენცია, არამედ იმასაც რომ ივანიშვილის გუნდს საერთოდ არ შესწევს უნარი მსგავს გამოწვევებზე სერიოზულად იმუშაოს. რუსეთის აგრესიულ ქმედებები წაახალისა საქართველოს მთავრობის მხრიდან ოკუპანტ სახელმწიფოზე ეფექტიანი საერთაშორისო დიპლომატიური ზეწოლის ფაქტიურმა მოხსნამ. ამასთან, ნეგატიური ფონი გაამძაფრა ოკუპირებული ტერიტორიის მიმდებარედ განლაგებული საპოლიციო დანაყოების და სპეციალური დანიშნულების რაზმების ფაქტიურმა დაშლამ, რითაც მთავრობამ მნიშვნელოვანი პრევენციული ფაქტორი მოშალა”, _განაცახდა კალდელაკმა.
მისი თქმით, შექმნილ ვითარებაში, ივანიშვილის ხელისუფლებიდან არჩევნების გზით ჩამოცილებამდე, აუცილებელია კარდინალურად შეიცვალოს ივანიშვილის მთავრობის პოლიტიკა.
,,ჩვენი ამოცანაა თავიდან ავიცილოთ ქვეყნისთვის სახიფათო ნებისმიერი გართულება, მაგრამ სწორედ ამ ამოცანის მისაღწევად აუცილებელია ადექვატური რეაგირება. წინააღმდეგ შემთხვევაში ვითარება ისეთ სახიფათო ზღვარს შეიძლება მიუახლოვდეს რომ სერიოზული გამწვავების თავიდან არიდება შეუძლებელი გახდება.კარასინი-აბაშძის ფორმატმა, რომელიც მთავრობის მიერ საკუთარი პიარის და არარსებული პროგრესის ტირაჟირებისთვის იქნა გამოყენებული, მოადუნა საერთაშორისო ყურადღება და რუსეთის აგრესიულ ნაბიჯებზე რეაგირება შეასუსტა. აუცილებელია სრული ფოკუსირება ჟენევის ფორმატზე რომელსაც შუამავლის სტატუსით ესწრებიან ევროკავშირი და აშშ.ასევე აუცილებელია ამ პრობლემის აქტუალიზაცია ყველა საერთაშორისო ფორმატში და ქვეყნის შიგნით პოლიციური დანაყოფების გაძლიერება ადგილზე რათა მათ, საერთაშორისო ზეწოლასთან ერთად, შეასრულონ ამ ტიპის პროვოკაციების შემაკავებელი როლი”, _განაცახდა კანდელაკმა.
