დღეს რუსეთის ფედერაციას პრაქტიკულად აქვს განცდა, რომ პოლიტიკური ფასის გარეშე გადადგამს ასეთ ნაბიჯს და ამიტომ არის, რომ ასე ადვილად ხდება ეს ყველაფერი, - ამის შესახებ ერთიანი ნაციონალური მოძრაობის საერთაშორისო მდივანმა გიგა ბოკერიამ საოკუპაციო ხაზის გადმოწევაზე საუბრისას განაცხადა.
მისი თქმით, . მტერმა იცის, რომ წინააღმდეგობის გამწევი მთავრობა არ ჰყავს ქვეყანას არც ადგილზე, არც საერთაშორისო ასპარეზზე.
,,ოკუპანტის დამოკიდებულება დიდი ხანია ცნობილია. ჩვენ გვყავს მტერი, რომელიც ცდილობს, რომ ჩვენი სახელმწიფოებრობა და ჩვენი თავისუფლება მოსპოს. პრობლემა მდგომარეობს იმაში, რომ ჩვენ არ გვყავს მთავრობა, რომელსაც გააჩნია ნება, წინააღმდეგობა გაუწიოს ამას ეფექტურად, რეალისტურ ფარგლებშიც კი. სამი წელია, ვაკვირდებით პოზიციების დათმობას ყველგან. როცა მტერმა იცის, რომ წინააღმდეგობის გამწევი მთავრობა არ ჰყავს ქვეყანას არც ადგილზე, არც საერთაშორისო ასპარეზზე, ის ბევრად უფრო ადვილად მოქმედებს. დღეს რუსეთის ფედერაციას პრაქტიკულად აქვს განცდა, რომ პოლიტიკური ფასის გარეშე გადადგამს ასეთ ნაბიჯს და ამიტომ არის, რომ ასე ადვილად ხდება ეს ყველაფერი და ამიტომ არის შესაცვლელი ის ხელისუფლება, რომელსაც არ გააჩნია არც სურვილი და არც ნება, რომ ეფექტური წინააღმდეგობა გაუწიოს ამ ყველაფერს” - აცხადებს გიგა ბოკერია.
შეგახსენებთ, 10 ივლისს, რუსეთის საოკუპაციო ძალებმა გორის რაიონის სოფელ წითელუბანსა და ოკუპირებული ახალგორის რაიონის სოფელ ორჭოსანის მიმდებარე ტერიტორიაზე ე.წ. საზღვრის აღმნიშვნელო ბანერები აღმართეს. საოკუპაციო ხაზს მიღმა მოექცა ბაქო-სუფსის მილსადენის დაახლოებით 1600-მეტრიანი მონაკვეთი. რუსული მხარის კონტროლირებად ტერიტორიაზე მოექცა 52 ჰექტარი მიწის ფართობი და დაზარალდა 97 ოჯახი. ჯერჯერობით უცნობია, მისცეემენ თუ არა საოკუპაციო ძალები ადგილობრივებს ქერისა და ხორბლის მოსავლის აღებას საშუალებას.
