საპარლამენტო უმრავლესობის წევრის ეკა ბესელიას შეფასებით, რუსეთის მიერ, ე.წ. სახელმწიფო საზღვრის აღმნიშვნელი ბანერების აღმართვა, მორიგი აგრესიული ქმედებაა, თუმცა ომით და სამხედრო აგრესიით ჩვენი პრობლემები ვერ გადაიჭრება.
აღნიშნული საკითხის კომენტირებისას დეპუტატმა განაცხადა, რომ საქართველოს აქვს არჩეული ერთადერთი სწორი გზა - საკითხის დიპლომატიური გზებით მოგვარებისკენ მიმართული.
,, საქართველოს საგარეო მიმართულებით და ჩვენი ევროინტეგრაციის გზაზე პრინციპული და მნიშვნელოვანი გადაწყვეტილებების პროცესში შიგადაშიგ ვაწყდებოდით და ვაწყდებით ჩვენი ჩრდილოელი მეზობლის მხრიდან აგრესიულ ქმედებებს, მაგრამ ჩვენი თანმიმდევრული, ფრთხილი და გააზრებული პოლიტიკა, საერთაშორისო ინსტრუმენტების გამოყენებაზე ორიენტირებული პოლიტიკა და არა აგრესიაზე, ომზე და საომარ მოქმედებებზე - უნდა გაგრძელდეს. ანუ ჩვენ უნდა გამოვრიცხოთ ყველა შემთხვევაში აგრესიული და სამხედრო ტიპის მექანიზმებით ამ პრობლემის გადაწყვეტა და ყველა საერთაშორისო ფორუმი იქნება გამოყენებული იმისთვის, რომ ის მორიგი უკანონობა, რასაც აქვს ადგილი, ქვეყნის სუვერენიტეტის კიდევ ერთხელ დარღვევა და საერთაშოისო პრინციპების დარღვევა იყოს შეჩერებული და ეს ვითარება იქნას გამოსწორებული. ამისთვის ყველა ძალისხმევა იქნება მიმართული ქვეყნის მხრიდან. ეს პოლიტიკა სწორია”, - განაცხადა ბესელიამ.
გორის რაიონის სოფელ წითელუბნისა და ოკუპირებული ახალგორის რაიონის სოფელ ორჭოსანის მიმდებარე ტერიტორიაზე, 10 ივლისს, რუსეთის საოკუპაციო ძალების მიერ, ე.წ. ,,საზღვრის“ აღმნიშვნელი ბანერები უკანონოდ აღიმართა. ოკუპირებულ ტერიტორიაზე მოექცა ასევე „ბაქო-სუფსას“ მილსადენის გარკვეული სეგმენტი.
