იუსტიციის მინისტრიმა თეა წულუკიანმა "დემოკრატიული მოძრაობის" ლიდერის ნინო ბურჯანაძის მიერ, რუსული ტელეარხის ეთერში გაკეთებული განცხადების კომენტირებისას აღნიშნა, რომ პუტინთან სტუმრობა და მისთვის ღიმილი არ მიაჩნია სიმამაცის მაჩვენებლად,
"პუტინთან სტუმრობა და მისთვის ღიმილი არ მიმაჩნია განსაკუთრებული სიმამაცის მაჩვენებლად. საქართველოს ჰყავს ის ხელისუფლება, რომელიც არ დაუშვებს სტაბილურობის მორღვევას ამ ქვეყანაში. საქართველოს ჰყავს ხელისუფლება, რომელიც არ დაუშვებს ომს ამ ქვეყანაში და საქართველოს ჰყავს მთავრობა, რომელსაც აქვს გონივრული, პრაგმატული და ევროატლანტიკური საგარეო პოლიტიკა. ეს არის სწორედ ის, რაც მიმაჩნია მამაცობის საუკეთესო მაგალითად იმიტომ, რომ გონივრული პოლიტიკის განხორციელება საქართველოსთვის არ არის ადვილი და ის, რაც არ არის ადვილი, არის სწორედ სიმამაცე", - განაცხადა თეა წულუკიანმა.
,,დემოკრატიული მოძრაობის” ლიდერის ნინო ბურჯანაძის განცახდებით, რუსეთ-საქართველოს ურთიერთობებში შეცდომები ორივე მხრიდან იყო დაშვებული, თუმცა ქართულ მხარეს არ ყოფნის ვაჟკაცობა, ღიად წავიდეს მოლაპარაკებებზე. ამის შესახებ, მოსკოვში ვიზიტისას ბურჯანაძემ ,,რასია-24“-ის ეთერში განაცხადა.
,,რუსეთ-საქართველოს ურთიერთობებში შეცდომები ორივე მხრიდან იყო დაშვებული. დღეს რუსეთთან ურთიერთობა უფრო ცივილიზებულია, თუმცა, სამწუხაროდ, ქართულ მხარეს არ ყოფნის ვაჟკაცობა, ღიად წავიდეს მოლაპარაკებებზე”, _აცხადებს ბურჯანაძე.
მისივე თქმით, არასწორია ქართველი პოლიტიკოსების განცხადება, როდესაც ამბობენ, რომ საქართველოს მიზანი ნატოში, ან ევროკავშირში გაწევრიანებაა ბურჯანაძის განმარტებით, ქვეყნის მიზანი უნდა იყოს სუვერენიტეტის გამტკიცება, დემოკრატიულობა, ტერიტორიული მთლიანობის აღდგენა.
შეგახსენებთ, რომ ბურჯანაძე მოსკოვში გუშინ გაემგზავრა. ბურჯანაძე რუსეთში დუმის სპიკერის სერგეი ნარიშკინის მიწვევით ჩავიდა. ყოფილი პარლამენტის თავმჯდომარე ნინო ბურჯანაძე მონაწილეობას მიიღებს რუსეთის სახელმწიფო დუმისა და რუსეთის საგარეო საქმეთა სამინისტროს მიერ ორგანიზებულ მრგვალ მაგიდაში.
ის მაღალი რანგის შეხვედრებსაც გეგმავს ფედერაციის საბჭოსა და რუსეთის საგარეო საქმეთა სამინისტროში.
